नाकाबन्दी लगाउन लबिङ गर्ने प्रमुख नाइके रञ्जित रे जस्ताको प्रशंसा गर्छन् उपराष्ट्रपति नै
फागुन ३ । उपराष्ट्रपति नन्दबहादुर पुनले नेपाल–भारत सम्बन्धलाई सबल र सुदृढ बनाउनमा नेपालका लागि भारतीय राजदूत रणजित रायले महत्वपूर्ण भूमिका निर्वाह गरेको बताएका छन् ।
आफ्नो कार्यकाल पूरा गरी भारत फर्कन तयारी गरिरहेका राजदूत रायलाई महामाना माल्भिया मिसनले काठमाडौंमा सोमबार आयोजना गरेको कार्यक्रममा उनले सो कुरा बताएका हुन् ।
उपराष्ट्रपति पुनले राजदूत रायको योगदानलाई नेपाली जनताले सधैँ सम्झिरहने बताउँदै आफ्नो कार्यकालमा नेपाल–भारत सम्बन्धलाई सफलतापूर्वक सम्पन्न गरेर फर्कन लागेकोमा राजदूत रायलाई बधाई दिए ।
माल्भिया मिसनले नेपालमा हिन्दू विश्वविद्यालय स्थापना गर्न सक्रियता देखाएको भन्दै उनले उक्त कार्यमा आफूले सहयोग गर्ने विश्वास व्यक्त गरे ।
वातावरण तथा जनसङ्ख्यमन्त्री जयदेव जोशीले सफलतापूर्वक आफ्नो कार्यकाल पूरा गरेका राजदूत रायले दुई देशको सम्बन्धलाई प्रगाढ बनाउन महत्वपूर्ण भूमिका निर्वाह गरेकोमा बधाई व्यक्त गरे ।
प्रमुख निर्वाचन आयुक्त डा अयोधिप्रसाद यादवले प्रजातन्त्रलाई चिरस्थायी बनाइराख्नका लागि आवधिक निर्वाचन अनिवार्य भएको भन्दै त्यसका लागि सबैको दबाबको आवश्यकता औँल्याए ।
राजदूत रायले आफ्नो कार्यकालमा दुई देशको सम्बन्धलाई सुमधुर बनाउन महत्वपूर्ण भूमिका निर्वाह गर्नुभएको स्मरण गर्दै उनले अगामी निर्वाचनमा भारतको सहयोग रहने अपेक्षा गरे ।
नेपालका लागि भारतीय राजदूत रायले नेपाल–भारत सम्बन्ध बहुआयामिक एवम् ऐतिहासिक रहेको चर्चा गर्दै घनिष्टतामा कहिलेकाँही तितो अवस्था आए पनि एकअर्काप्रति सफा मनसायले सहयोग आदानप्रदान हुँदै आएको बताए ।
आयोजक माल्भिया मिसन नेपालका अध्यक्ष योगाचार्य जिएन सरस्वतीले पाँच वर्षअघि स्थापना गरिएको मिसनले नेपालको काभ्रेस्थित भकुन्डेबेँसीमा स्थापना गर्न लागिएको हिन्दू विश्वविद्यालय स्थापनाका लागि पहल गर्न सबैसँग आग्रह गरे ।
