मोर्चाको चाहना संविधान जारी नै हुन नदिने थियो, अब बिथोल्ने, रोक्ने नियत देखियो (भिडियोसहित)
चैत–६ । नेकपा एमालेका नेता माधवकुमार नेपालले मधेसी मोर्चा नआए पनि निर्वाचन सफल हुने बताएका छन् । नेपालआजसँगको कुराकानीका क्रममा मधेसी मोर्चाको नियत सुरुदेखि नै मुलुक बिथोल्ने मात्रै भएको जिकिर नेता नेपालको छ ।
नेता नेपालले भने, ‘उहाँहरुको त संविधान जारी हुनै नदिने योजना थियो । तर जारी भयो । फेरि संशोधनको कुरा गर्नुभयो । त्यो पनि पूरा भयो । त्यसले पुगेन फेरि अर्को अड्को थाप्नु भयो ।’
मोर्चाले आफूले भने बमोजिम सबै हुँदा ठीक नत्र भाँडभैलो गर्ने नीति लिएकोले समस्या उत्पन्न भएको नेता नेपालको भनाइ छ । नेपालले मधेसी मोर्चा लोकतन्त्रमा विश्वास गर्ने शक्ति भएकोले निर्वाचनमा सहभागी हुने विश्वास व्यक्त गरे ।
मधेसी मोर्चाले अहिले अड्काएको विषय नै संघीयताविरोधी भएको नेपालले टिप्पणी गरे । उनले भने, ‘४७ सालको संविधानमा नभएको अधिकार जनतालाई दिइएको छ । स्थानीय तहका प्रमुख उपप्रमुखले राष्ट्रिय सभा सदस्य चुन्न पाउने त्यो अधिकार मोर्चाले हनन गर्नु पर्छ भन्छ । संघीयता विरोधी यस्ता तत्वको विरोध गर्दा मधेस विरोधी हुनु पर्ने ? ’
नेता नेपालले सत्ताधारी दलहरुको नियत निर्वाचन गराउने तर्फ कम रहेको बताए । उनले भने, ‘सत्ताधारीले चुनाव गराउँछौ भनेका छन् । विश्वास गरेका छौं । तर यिनीहरुको नियत सफा छैन ।’
नेपालमा अतिराष्ट्रवाद भन्दा पनि लम्पसारवादी, आत्मसमर्पणवादी हावी हुने खतरा बढेको नेता नेपालले बताएका छन् ।
राष्ट्रपति विद्यादेवी भण्डारीको भारत भ्रमणमा दिइएको बिदामा पनि नेता नेपालले आपत्ति जनाएका छन् । उनले बिदै बिदा भएको देशमा राष्ट्रपति विदेश भ्रमणमा जाँदा पनि आउँदा पनि विदा दिनु निरर्थक भएको उल्लेख गरे ।
ex primeminister madhav kumar nepal
