जेठ–६ । धेरैले चासो दिइरहेको भरतपुरमहानगरको मतगणना जारी छ । तर परिणाम अपडेट गरिएको छैन । यस्तो किन त ?

मुख्य निर्वाचन अधिकृत कविप्रसाद न्यौपानेले समेत यो प्रश्नको ठोस जवाफ दिएनन् । उनले भने, ‘दलहरुबीचको विवादले यस्तो भएको हो ।’विवाद चाहिँ के कुरामा भएको हो ? त भन्ने प्रश्नमा उनले मत परिणाम के कसरी सार्वजनिक गर्ने भन्ने विषयमा कुरा नमिलेको बताए ।  यति भएर पनि विषय बुझिएन । फेरि सोधियो मत परिणाम कतिबेला अपडेट हुन्छ त ? उनले भने –‘कुरा मिलेपछि हुन्छ ।’

शुक्रबार बेलुकादेखि नै भरतपुर महानगरको मत परिणामको अपडेट आएको छैन । कारण स्पष्ट पारिएको छैन । सदर मत र बदर मत सार्वजनिक नगरिएको, मतगणनामा स्पष्टता नभएको भन्दै शुक्रबार दलका नेता कार्यकर्ताले मतगणनास्थलबाहिर नाराबाजी गरेका थिए । त्यसपछि मतगणना स्थगित गरिएको बताइयो । तर प्रमुख निर्वाचन अधिकृत न्यौपानले भने मतगणना स्थागित नभएको जानकारी दिए ।