रवीन्द्र मिश्र नेतृत्वको साझा पार्टीले चुनाव मिति सच्चाउन आग्रह गरेको छ । पार्टीका प्रवक्ता सूर्यराज आचार्यले मंगलबार विज्ञप्ति जारी गर्दै दोस्रो पटक सारिएको मिति उपयुक्त नभएको जनाएका छन् ।

चुनावको मिति रमजानको अन्तिम शुक्रबार नपार्न साझा पार्टीले आग्रह गरेको हो । सरकारले स्थानीय तहको दोस्रो चरणको चुनावको पूर्व निर्धारित मिति सारेर आउँदो असार ९ गतेका लागि तोकेको छ ।

असार ९ गने इस्लाम धर्मावलम्बीहरुको पवित्र महिना रमजानको अन्तिम शुक्रबार परेको उल्लेख गर्दै साझा पार्टीले सो दिन एक महिने व्रत (रोजा) का बेला अझ महत्वपूर्ण मानिने जनाएका छ ।

इस्लाम धर्मावलम्बीको महान चाड ईद–उल–फित्रको दुई–तीन दिनअघि र रमजानको अन्तिम शुक्रबार चुनावको मिति राखिएको भन्दै साझा पार्टीले निर्वाचनको मिति अविलम्ब पुनर्विचार गर्न आग्रह गरेको छ ।

१२ लाख भन्दा बढी इस्लाम धर्मावलम्बी रहेको मुलुकमा रोजाका बेला निर्वाचनको मिति उपयुक्त नभएको सो पार्टीले जनाएको छ ।