पहिलो चरणको चुनाव लाग्यो, यस्तो छ तालिका
वैशाख १९ । पहिलो चरणको स्थानीय निर्वाचन आजदेखि औपचारिक रुपमा सुरु हुँदैछ । आज विहान १० बजेदेखि बेलुका ५ बजेसम्म ३४ जिल्लाका २ सय ८३ स्थानीय तहका लागि मनोनयन दर्ता गर्ने कार्यसूची छ । यसका लागि दलहरु धमाधम उम्मेद्वारहरुको टुंगो लगाउन जुटेका छन् ।
पहिलो चरणको चुनावमा देशका चारवटा महानगरपालिकामा समेत चुनाव हुने भएकाले यो निर्वाचनको रौनक बढेको छ । बैशाख ३१ गते काठमाडौं, ललितपुर, भरतपुर र पोखरासमेत देशका चारैवटा महानगरपालिकामा निर्वाचन हुनेछ ।
कुन–कुन जिल्लामा हुँदैछ चुनाव ?
पहिलो चरणको निर्वाचन प्रदेश नम्बर ३, ४ र ६ का कुन ३४ जिल्लाहरुमा हुँदैछ ।
प्रदेश नम्बर ३ मा सिन्धुली, रामेछाप, दोलखा, काभ्रेपलाञ्चोक, सिन्धुपाल्चोक, नुवाकोट, रसुवा, धादिङ, मकवानपुर, चितवन, काठमाडौं, ललितपुर र भक्तपुर समेत गरी १३ वटा जिल्ला छन् ।
त्यसैगरी प्रदेश नम्बर ४ मा गोरखा, लमजुङ, मनाङ, मुस्ताङ, म्याग्दी, बागलुङ, पर्वत, स्याङजा, तनहुँ, कास्की र नवलपरासीको केही भागसमेत गरी ११ वटा जिल्ला पर्छन् ।
प्रदेश नम्बर ६ का जिल्लाहरुमा हुम्ला, कालीकोट, डोल्पा, जुम्ला, दैलेख, मुगु, जाजरकोट, सुर्खेत, सल्यान र रुकुमको केही भाग गरी ११ जिल्लाहरु समेटिएका छन् ।
यस्तो छ निर्वाचन कार्यक्रम
उम्मेदवार मनोनयन दर्ता– बैशाख १९ गते (बिहान १० देखि ५ बजेसम्म) उम्मेदवारको सूची प्रकाशन– बैशाख १९ गते (बेलुका ५ः३० बजे) उम्मेदवारको विरोधमा उजुरी– बैशाख २० गते (विहान १० बजेदेखि १ बजेसम्म) मनोनयनपत्र जाँच–बैशाख २० गतेदेखि २१ गतेसम्म (दिउँसो १ बजेदेखि ११ः३० सम्म) उम्मेदवारको नामावली प्रकाशन–बैशाख २१ गते (११ः३० देखि १ बजेसम्म) उम्मेदवारले नाम फिर्ता लिने–बैशाख २१ गते ( दिउँसो १ बजेदेखि ५ बजेसम्म) उम्मेदवारको अन्तिम नामावली प्रकाशन–बैशाख २२ गते (बिहान १० देखि ११ बजेसम्म) उम्मेदवारलाई निर्वाचन चिन्ह प्रदान–बैशाख २२ गते ( बिहान ११ देखि ५ बजेसम्म) मतदान गर्ने–बैशाख ३१ गते (बिहान ७ देखि बेलुका ५ बजेसम्म)
