राजपा नेपालका अध्यक्ष मण्डलका नेता राजेन्द्र महतोले चुनाव सार्ने सरकारको निर्णय एकलौटी भएको बताएका छन् । उनले राजपा नेपालसँग कुनै सल्लाह नगरी यस्तो निर्णय गरेको उल्लेख गरे । राजपाले घोषणा गरेको आन्दोलनका दौरान तराईमा रहेका नेता महतोले राजपाको औपचारिक धारणा शुक्रबार दिउँसो बस्ने अध्यक्ष मण्डलको बैठक पछि आउने जानकारी दिए । काठमाडौं आउन सिमरा विमानस्थलमा रहेका महतोसँग नेपाल आजले गरेको कुराकानीको संक्षिप्त अंश यस्तो छः

सरकारले चुनाव सार्ने निर्णय गरेको छ अब त तपाईहरु खुसी हुनुहुन्छ होला नी ?
– हामी किन खुसी हुने ? हामीले चुनाव सार्नु पर्छ भनेकै छैन । सरकार आफूखुसी बहुलठ्ठीपूर्ण काम गर्दै हिडेको छ ।

प्रदेश नम्बर २ मा निर्वाचन तपाईहरुलाई नै सोधेर सारेको भन्ने कुरा छ नी त !
–तपाईलाई सोधेको भए थाहा छैन । तर हामी आन्दोलनकारी शक्तिलाई सोधेको छैन । हामीले चुनाव सार्ने माग नै गरेका छैनौं । माग्दै नमागेको माग सरकार किन पुरा गर्छ बुझेको छैन मैले ।

जे गर्दा पनि तपाईहरु मान्दै मान्नु हुन्न किन ?
– समस्या प्रदेश नम्बर २ को मात्रै होइन । झापा देखि कञ्चनपुरसम्म मधेसको सबै जिल्लामा चुनाव सारेको भए हामीले सोच्ने थियौं । मधेस भनेको त प्रदेश नम्बर २ मात्रै त होइन । यसकारण यो सरकारले विखण्डनवादी काम गर्यो । प्रदेश नम्बर २ चाहि छुट्याउने जस्तो गरी यहाँ मात्रै चुनाव सारेको छ ।

भने पछि आन्दोलन रोक्नु हुन्न ?
आन्दोलन अझै सशक्त हुन्छ । हामी कडा प्रतिरोध गर्छौ । चुनाव हुँन दिँदैनौं ।

तपाई अहिले कहाँ हुनुहुन्छ ?
– म सिमरामा छु । काठमाडौं आउन जहाज पर्खिरहेको छु ।(शुक्रबार बिहान ९ बजे )

कति बजे छ अध्यक्ष मण्डलको बैठक ?
– आज दिउँसो हुन्छ । त्यसपछि आधिकारिक धारणा आउनेछ । तर अहिले मैले भनेको कुरा जस्तै नै हो आधिकारिक धारणा पनि ।

अध्यक्ष मण्डलका महिन्द्रराय यादव र सरतसिंह भण्डारीले त सरकारको कदमको स्वागत गर्नुभयो नी ?  

त्यो किन गर्नुभयो उहाँहरुलाई नै सोध्नुस । म के भनौं ।

तपाईलाई उपेन्द यादवले नक्कली नेपालीसमेत भन्नु भयो, के भन्न चाहनु हुन्छ ?
–म उपेन्द्र यादवका बारेमा टिप्पणी गर्न चाहन्न । सबै कुरा जनताले हेरिरहेका छन् । समय आएपछि उपेन्द्रलाई जनताले जवाफ दिने छन् ।