चुनाव हारजित हुनु स्वाभाविक हो, तर मुलुक हार्नु हुँदैन – प्रचण्ड
असार - ८ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले मधेस, पहाड र हिमालका जनतालाई एकताको सूत्रमा जोडेर मात्र मुलुकको विकास क्रमलाई अघि बढाउन सकिने बताएका छन् ।
विहीबार बाँके जिल्लाको चार बेग्लाबेग्लै स्थानमा आयोजित चुनावी सभालाई सम्बोधन गर्दै उनले मधेसी, पहाडी र जनजातिलाई अपमान गर्ने साँचो अर्थमा राष्ट्रवादी हुन नसक्ने बताउनुभयो । मधेस, पहाड र हिमालमा बसोबास गर्ने आमनेपालीको एकताका कारण नै संविधानले स्वीकार्यता पाएको स्पष्ट पारे।
“निर्वाचन अमुक पार्टी विशेषको हुँदै होइन, यो त जनताको सार्वभौम अधिकारसँग जोडिएको विषय भएकाले यसबाट पछि हट्नु भनेको जनताको अधिकारलाई स्वीकार गर्न नसक्नु नै हो” – अध्यक्ष दाहालले भने ।
पूर्वप्रधानमन्त्री दाहालले भने – “मुलुकको आमूल परिवर्तनका लागि जनताको बलमा हतियार उठाएको आफ्नो दलले अहिलेको परिवर्तनलाई संस्थागत गर्न खोजेको छ । सिंहदरबारको अधिकार गाउँमा पु¥याउन खोजेको छ । यसमा आमजनताले हामीलाई साथ दिनेछन् ।”
उनको थप भनाइ थियो – “चुनाव हारजित हुनु स्वाभाविक हो, तर मुलुक हार्नु हुँदैन, जनता हार्नु हुँदैन, लोकतान्त्रिक व्यवस्था हार्नु हुँदैन । यो भावना जनजनमा प्रवाहित हुनु जरुरी छ, निर्वाचनलाई त्यसरी नै बुझनुपर्छ ।” रासस
