अमेरिकामा सामाजिक सन्जालमा ‘स्टन्ट’ गरेको भिडियो राखेर ‘फ्लओर’ बढाउन एक प्रेमिकाले आफ्नै प्रेमीलाई गोली प्रहार गरेर मारिदिएकी छन् ।

मध्यपश्चिम अमेरिकाको मिनेसोटा सहरकी १९ वर्षीया मोनालिसा पेरेजले गत सोमबार आफ्नै पे्रमी पेड्रो रुइजलाई सामाजिक सन्जालमा ‘स्टन्ट’ गरेको भिडियो पोस्ट गर्न ०.५० क्यालिबरको पेस्तोलले गोली हानेर मारिदिएकी हुन् ।

मोनालिसाले आफ्नो पे्रमीले सामाजिक सन्जालमा ‘फ्लओर’ बढाउन ‘स्टन्ट’ गर्न पेस्तोलको प्रयोग गर्न जिद्धी गरेपछि अन्जानमा ज्यान गएको बताएकी छिन् ।
ती दुबै जोडीले गरेको स्टन्ट ३० जना छिमेकीले प्रत्यक्ष देखेका थिए । अहिले उनलाई प्रहरीले हिरासतमा लिएको छ । मिनेसोटा प्रहरीले उनीहरुले गरेको स्टन्ट भिडियो क्यामेरामा कैद भएको उल्लेख गरेको छ ।

भिडियोमा पेड्रोले इन्साक्लोपिडियाको मोटो किताब छातीमा राखेको र मोनालिसाले एक फिट टाढाबाट पेस्तोल हानेको दृष्य कैद भएको प्रहरीले जनाएको छ ।
मोनालिसाकी साथी क्लाडिया पेरेजले ‘डब्ल्युडे’ टीभीलाई दिएको अन्तर्वार्तामा सुरुमा पेड्रोको स्टन्ट गर्ने तरिका मोनालिसाले नमानेको बताएकी छन् ।

तर, पेड्रोले त्यसरी गोली हान्दा किताबमा धस्सिने र आफूलाई केही नहुने बताएपछि मोनालिसा गोली हान्न राजी भएकी थिइन् । क्लाडियाकाअनुसार मोनालिसा अहिले गर्भवती रहेको र उनीहरु दुबैले एक–अर्कालाई असाध्यै माया गर्दथे ।