सप्तरी । सप्तरीको कुलाडी गाउँका फुदन केही समयदेखि धरानमा ज्याला मजदुरी गर्दै आएका थिए । उनी गाउँमा सामान्य ज्यालादारी गरी जीविकोपार्जन गर्दै परिवार धान्छन् । घरको मजदुरीले पारिवारिक अवश्यकता पूरा गर्न नसकिने देखिएपछि उनी केही वढी कमाउने उद्देश्यले धरान हानिएका थिए । उनले काम सुरु गरेको १५ दिनमात्र भएको थियो । अरुदिन जस्तो त्यसदिन पनि उनी आफ्नै काममा व्यस्त थिए ।

त्यस दिन देशका पूर्वी भेगमा भारी वर्ष भइरहेको थियो । वर्षाका कारण आफ्नो कामलाई असर पार्ने कुराले उनी निरास थिए । तर, यही वर्षाले परिवारमा कुनै आपत्ति आउला भन्ने सायद सोचेका समेत पनि थिएनन् उनले । जीवनमा नसोचेकै हुन्छ भनिन्छ । त्यस्तै भयो ।

सधैँ झै उनी काममै व्यस्त थिए । साहुलाई उनको छिमेकीले फोन गरेर सुनाए हृदयविदारक समाचार । अविरले वर्षपछि आएको बाढीले उनको ८ वर्षीय कलिलो छोराको ज्यान लिइ छाड्यो ।

छोराको मृत्यु भयो भन्ने खबरले उनको हालत खराब भयो । मृतक छोराको अन्तिमपटक मुख हेर्ने सोच बनाए । घर जानुवाहेक अरु कुनै विकल्प थिएन । उनले साहुसँग आफूले कमाई गरेको पैसा मागे ।

तर, बिल पास भएन । उनीले आफ्नो कमाइको ३ हजार रुपैयाँ समेत पाएनन् । साहुले उनलाई पेश्की दिन पनि इन्कार गरिदिए । आफूसँग एक पैसा थिएन, साहुले पनि पैसा दिन अस्वीकार गरिदियो । छोराको मृत्युले विचलित बनेका फुदनले हिँडेरै घरसम्म पुग्ने निर्णय गरे । विपतको घडीमा पुगेका उनले कसैको सहयोग माग्ने सामथ्र्य पनि राख्न सकेनन् ।

उनी धरानबाट हिँड्दा लगातार मुसलधारे पानी परिरहेको थियो । पानीको वास्तै नगरी बाटोमा लड्दै समालिदै उनी धरानदेखि घरसम्म आउन तयार भए । उनी भोकैप्यासै १ सय ३० किलोमिटरको पैदल यात्रा तय गर्दै उनी एक रात दुई दिनमा घर आइ पुगे । एक रात उनले बाटो मै खुला आकास मुनी बिताए । किनकि होटेलमा बस्नका लागि उनीसँग पैसा पनि थिएन ।

दुई दिनको पैदल यात्रा गरेर घर पुगेका फुदनले छोराको अनुहार समेत हेर्न पाएनन् । मुसहरहरुको चलनअनुसार मृतकको शवलाई तीनदिन भन्दा बढी राख्न नहुने बताइन्छ । मृतकको शवलाई जलाउने वा गाड्ने परम्परा यस समुदायको छ ।

तर, गाड्न र जलाउनका लागि जमीन समेत भेटिएन । जमीन नभेटिएपछि मृतक बालकको शवलाई कोशीमा बगाएर अन्तिम संस्कार गरिएको थियो । उनका छोरालाई एक दिन अगाडि नै खोलामा बगाइएको थियो । दुई दिनको पैदल घर पुगेका उनी छोराको अन्तिम संस्कार गर्न नपाउँदा उनी निरास छन् ।

मृतक कमलुका परिवार अहिले सानो पालमा १५ जना जति अटाएर बसिरहेका छन् । राहत नपुगेकाले अहिले उनीहरुसँग खान र लगाउनको लागि केही छैन । उनीहरु लगायत त्यहाँ ३०० घर राहतको पखाईमा छन् ।

कमलुको परिवार र उनीजस्तै अन्यका लागि तलको लिंकमार्फत सहयाग गर्न सकिन्छ ।

(सहयागको लागि: https://www.gofundme.com/kamalfamilysupport)

फोटो/भिडियो: गगन थापा 

 

saptari flood