वामदेवले भने, ‘अच्युत खरेलले बदला लिन खोजे’
काठमाडौं । सत्तारूढ नेकपाका सचिवालय सदस्य वामदेव गौतमले नेपाल प्रहरीका पूर्वमहानिरीक्षक अच्युतकृष्ण खरेलद्वारा प्रकाशित आत्मकथामा आफ्नो चरित्र हत्या गर्न खोजिएको बताएका छन् ।
पूर्वउपप्रधान तथा गृहमन्त्रीसमेत रहेका गौतमले खरेलले प्रकाशित गरेको ‘अच्युतकृष्ण खरेल आत्मकथा’ पुस्तकमा आफूलाई इङ्गित गरी एक पत्रकारमार्फत २० लाखको प्रस्ताव पठाउँदा अस्वीकार गरेको झूटा कुरा लेखेर चरित्र हत्या गर्न खोजेको आरोप लगाए ।
‘खरेलको आत्मकथामा मैले कुन पत्रकार पठाएर २० लाख प्रस्ताव गरे । २० लाखको प्रस्ताव लिएर आउने त्यो पत्रकार को थियो ? खरेलले त्यो पुष्टि गर्नुपर्दछ’, उनले भने, ‘आफ्नो आत्मकथामा मेराबारे तथानाम जे पायो त्यही झूटा र असत्य कुरा लेखेर चरित्र हत्या गर्न खोज्ने ?’
उनले खरेलले आइजिपीबाट हटाएको बदला लिन आफ्नो आत्मकथामार्फत कपोलकल्पित कुरा सार्वजनिक गरेको दाबी गरे । खरेलले लेखेका कुरामा कुनै सत्यता नभएको उल्लेख गर्दै नेता गौतमले स्थानीय निर्वाचन गर्न नसक्ने भएपछि पार्टीको निर्देशनमा खरेललाई प्रहरी प्रमुखबाट हटाएको स्पष्ट पारे ।
‘मलाई खरेललाई हटाउने चाहना थिएन । म गृहमन्त्री भइसकेपछि तत्कालीन पार्टी अध्यक्ष मनमोहन अधिकारी र महासचिव माधव नेपालले पहिलो काम स्थानीय निर्वाचन गर्नुपर्दछ भन्नुभएको थियो’, उनले भने, ‘तर, खरेलबाट स्थानीय निर्वाचन हुने सम्भव देखिएन । अनि बाध्य भएर पार्टीकै निर्देशनमा तत्कालीन प्रधानमन्त्री लोकेन्द्रबहादुर चन्दको सहमतिमा खरेललाई हटाएको हुँ ।’ खरेललाई नहटाएको भए स्थानीय तहको निर्वाचन हुनै नसक्ने गौतमको दाबी थियो ।
