कार्यकर्तालाई निजी शिक्षण संस्था खोल्न लगाएर सरकारी ध्वस्त पारियो (भिडियोसहित)
प्रकाश शाही, नेत्रविक्रम चन्द विप्लव नेतृत्वको नेकपाको भातृ संगठन अनेरास्ववियु क्रान्तिकारीका सचिव हुन् । लोकमान सिंह कार्कीलाई कालोमोसो लगाएर चर्चामा आएका शाहीले नेपालआजसँग विद्यार्थीका माग, समस्या र समाधानबारे गहन विचार राखेका छन् । प्रस्तुत छ उनका विचार उनकै शैलीमाः
‘विद्यार्थीका मागहरु पूरा हुँदै भएनन् भन्ने होइन, धेरै कुराहरु पूरा पनि भएका छन् । विद्यार्थी संगठनहरु भनेका विशुद्ध विद्यार्थीका लागि मात्रै बोल्ने संगठनका रुपमा स्थापित छैनन् । उनीहरु पार्टीको भातृ संगठन भएको दृष्टिले जनताका सवालहरु पनि उठाउँछन् ।
राजनीति ठीक ठाउँमा छैन भने सबै कुरा भएर पनि केही उपलब्धी प्राप्त हुँदैन । उदाहरणकालागि अहिले हेरौं न । अहिले दुई तिहाईको सरकार छ । त्यो पनि कम्युनिष्ट कै सरकार हो । समाजवाद उन्मुख त संविधान मै उल्लेख छ । तर पनि यो सरकारले विद्यार्थी मजदुर, गरिब किसानको लागि काम गर्न सकेको छैन । किनभने राजनीति ठीक ठाउँमा नभएको कारण यस्तो भएको हो ।
यो देशमा विद्यालय, विश्वविद्यालयको हालत विद्यार्थी संगठनका कारण भएको होइन । राजनीतिका कारण यो सबै भएको हो । विश्वविद्यालयको भिसी र रेक्टर भागवण्डाका आधारमा नियुक्त हुन्छन् । क्षमता र योग्यताका आधारमा पदाधिकारी नियुक्त हुँदैनन् । विगतमा जो शिक्षाको विकृति हटाउन आन्दोलन गरेका थिए, तिनै अहिले शिक्षा मन्त्रालयमा र वरपर छन् । उनीहरुले नै चाहेनन् शिक्षामा सुधार गर्न । नेपालको शिक्षा माफियाको हातमा पुगेको छ ।
संसदीय व्यवस्थाले बहुसंख्यक मानिसको प्रतिनिधित्व गर्दैैन । संसदीय व्यवस्थामा ठेकेदार, माफिया, व्यापारीहरु पनि सांसद हुन्छन् । नीति निर्माणमा पुग्छन् । हाम्रो नेपाल कम्युनिष्ट पार्टीले एकीकृत जनक्रान्तिको माध्यमबाट हामी समाजवादी व्यवस्था ल्याउँछौं र संसदीय व्यवस्थाले पूरा गर्न नसकेका काम सम्पन्न गर्छौं । अबको बाटो त्यही नै हो ।
लोकमान सिंहलाई हामीले कालोमोसो दलेका हौं । जनआन्दोलन दबाउनेलाई नै संवैधानिक पदमा नियुक्त गरेपछि त्यसको प्रतिकार गरेका हौं हामीले । कानुनविपरीत हामीले जे जे गर्यौं, त्यसको सजाय पनि पाएका छौं । तर पनि जनताले कारबाही होस् भन्ने चाहनालाई हामीले पूरा गर्यौं । त्यसबापत हामीले जे जस्ता सजाय पाउने थियौं, त्यो जोखिम अरुले उठाएनन् । हामीले उठायौं ।
थोरै मानिसहरुले कुनै फरक वा कानुनविपरीत काम गरे भने त्यो अराजकता हुन्छ । त्यही काम बहुसंख्यकले गरे भने त्यो काम आन्दोलन हुन जान्छ । हामीले जनताको मनमा भएको काम गरेका छौं । हामीले फटाहाहरुलाई जनकारबाही गर्दा जनताहरु खुसी भएका छन् । जनताले हामीलाई प्रशंसा र सम्मान गरेका छन् । कानुनको कुरा बेग्लै हो, तर जनताले भने हाम्रो कामलाई वैधानिक बनाएका छन् ।
कानुनले के भन्छ थाहा छैन, जनताले हामीलाई वैधानिकता दिएका छन्
एक कक्षामा १४ लाख विद्यार्थी भर्ना हुन्छन् । एसईईमा ४ लाख मात्रै विद्यार्थी हुन्छन् । बीचमै ८–९ लाख विद्यार्थी हराउँछन् । यो कति ठूलो समस्या होला त ? पाठ्यक्रममा पनि राष्ट्रियताको कुरा छैन । आफू कसरी अगाडि जाने, कसरी आफ्नो भलो गर्ने भन्नेमा पाठ्यक्रम केन्द्रीत छ । शिक्षा पद्धति मै खोट छ । वैज्ञानिक शिक्षा पद्धति चाहिनछ । विश्वविद्यालयहरु पनि समस्याग्रस्त छन् ।
कृषि तथा वन विज्ञान विश्वविद्यालयले आफ्नै चार आंगिक व्यवस्थित गर्न सकेको छैन । उसलाई अरु आठ दश वटा कलेजलाई सम्बन्धन नदिई उसलाई भएको छैन । यस्ता बेथितिमा कहिले सरकारले वास्ता गरेको छैन । आफ्नै कार्यकर्तालाई निजी स्कुल, कलेज खोल्न लगाएका छन् राजनीतिक दलका नेताहरुले । अनि उनीहरु सरकारी गुणस्तर ध्वस्त पारेर निजीमा विद्यार्थी धकेल्न चाहन्छन् ।
कोही पनि विद्यार्थीहरु अहिले स्वदेशमा बस्न चाहँदैनन् । नारामा समृद्ध नेपाल सुखी नेपाली भन्ने नारा लिइएको छ । तर व्यवहारमा कुनै फरकपन छैन । यसकारण नै हामी आन्दोलित हुनुपरेको हो ।’
