नारायण गोपालको २८ औं स्मृति दिवस आज
काठमाडौं । स्वरसम्राट नारायण गोपालको बुधबार २८ औं स्मृति दिवस मनाईँदैछ ।
वि सं १९९६ सालमा काठमाडौंको किलागलमा जन्मिएका नारायण गोपालको २०४७ साल मंसिर १९ गतेका दिन निधन भएको थियो ।
संगीतका हरेक विधाका गीतमा दिएको अद्भूत स्वरका कारण उनी नेपाली सांगीतिक क्षेत्रका सर्वाधिक सफल गायक सावित भएका छन् । आफ्नो गायकीबाट सबैलाई आकर्षण गरेका उनले स्वर सम्राटको उपाधि पाएका थिए ।
विक्रम सम्वत् २०२० सालमा रेडियो नेपालबाट माणिकरत्न स्थापित र प्रेमध्वज प्रधानको संगीतमा गीत गाएर स्वर परीक्षा पास गरेका नारायण गोपालले त्यसपछि गायन यात्रालाई निरन्तरता दिए ।
उनले आफ्नो गायन यात्रामा एक सय ३६ भन्दा धेरै गीत गाएका छन् । नारायण गोपालले आधुनिक मात्र नभएर डेढ दर्जन जति नेपाली चलचित्रका गीतमा पनि आवाज दिएका छन् । उनका गीत आजका दिनमा समते उत्तिकै सान्दर्भिक छन् । उनका गीत नेपाली सांगीतिक क्षेत्रमा सदैव उत्कृष्ट ठहरिदै आएका छन् ।
नारायण गोपाल संगीत कोषले प्रत्येक वर्ष उनको स्मृति दिवसका दिन विभिन्न सांगीतिक कार्यक्रम पनि गर्दै आएको छ ।
