कैलाली । कैलालीको घोडाघोडी नगरपालिकाका प्रमुख ममताप्रसाद चौधरीलाई गोली प्रहार गरेको आरोपमा पक्राउ परेका चार जनालाई प्रहरीले सार्वजनिक गरेको छ ।

जिल्ला प्रहरी कार्यालय धनगढीले आज पत्रकार सम्मेलन गरी चौधरीलाई गोली प्रहार गरेको अभियोगमा पक्राउ परेका घोडाघोडी नगरपालिका–१ लक्ष्मीपुरका कमल क्षेत्री, सोही नगरपालिका–९ का भरतबहादुर शाह, धनगढी उप–महानगरपालिका ८ का पूर्णप्रसाद खनाल र टीकापुर नगरपालिका–१ का हृदयराज बोगटीलाई सार्वजनिक गरेको हो । उनीहरु नेत्रविक्रम चन्द नेतृत्वको नेकपाका आवद्ध रहेको र घटनामा सम्लग्न अन्य ९ जनाको खोजी भइरहेको प्रहरीले जनाएको छ ।

फागुन २८ गते राति प्रमुख चौधरीलाई खुकुरी र गोली प्रहार गरिएको थियो । टाउकोमा खुकुरी र कम्मर मुनी गोली लागेर घाइते भएका चौधरीको शिक्षण अस्पताल महाराजगञ्जमा उपचार भइरहेको छ ।