काठमाडौं । नेपाली कांग्रेस काभ्रेले यूवा नेता गणेश लामालाई तत्काल रिहाई नगरिए सडक र सदन दुवैमा शक्ति प्रदर्शन गर्ने चेतावनी दिएको छ । रिपोर्टर्स क्लब नेपालमा नेपाली कांग्रेस जिल्ला कार्यसमिति काभ्रेले शुक्रबार पत्रकार सम्मेलन गरेर यस्तो चेतावनी दिएको हो ।

 

बुधबार साँझ राजधानीको गौशालाबाट प्रक्राउ परेका लामालाई सुनियोजित ढंगले फसाउन खोजेको आरोप लगाउँदै कांग्रेस जिल्ला कार्यसमिति काभ्रेले तत्काल लामालाई रिहाई गर्न माग गरेको छ । नेपाली कांग्रेस जिल्ला कार्यसमिति काभ्रेका सभापति मधु आचार्यले नागरिकको सुरक्षाको लागि कांग्रेसले जुनसुकै कदम चाल्ने बताए ।

 

उनले भने,‘हामी यस कार्यप्रति घोर भत्र्सना गदछौँ, कांग्रेसका यूवा नेता गणेश लामा शारीरिक ब्यायामबाट घर फर्किदै गर्दा गौशाला नजिक उनीमाथि गोली प्रहार भयो, भाग्यवश उनलाई गोली लागेन, उनीमाथि गोली प्रहार गर्नेलाई प्रहरीले समातेन, तर गणेशजीलाई हात हतियारसहित लामा पकाउ गर्यौँ भनेर प्रहरीले सूचना जारी गर्यो, योभन्दा गैर–जिम्मेवारी कुरा के हुन सक्छ ? लामाले आफूमाथि गोली हान्नेलाई समात्न खोज्दा उनीहरु भागे, प्रहरीले भाग्नेहरुलाई नसमातेर लामालाई मात्रै समात्यो, गोली हान्ने मानिस भाग्छ, प्रहरीले लामालाई षड्यन्त्रपूर्वक समात्छ, प्रहरीले देखाएको यो कस्तो नाटक हो ?’

 

उनले भने ,‘हामीले त्यो समयका प्रत्यक्षदर्शी र सिसिटिभी क्यामेरामा कैद भएका फुटेज हेर्दा साधा पोशाक लगाएका प्रहरीले नै लामामाथि गोली हानेको शंका गरेका छौँ, यस्तो स्थिति हो भने मन नपरेका मानिसलाई अधिनायकवादी सरकारले प्रहरी प्रशासन लगाएर मार्ने अनि संविधान प्रदत्त नागरिकले बाँच्न पाउने हकमाथि कुठाराघात गर्ने अनि कसरी हामीले सरकारको विश्वास गर्ने ?’

 

त्यस्तै कांग्रेस जिल्ला कार्यसमिति काभ्रेका सचिव दिनेश लामाले गणेश लामालाई विना शर्त रिहाईको माग गरे ।