प्रहरी भन्याे: पराजुलीविरुद्ध जाहेरी दर्ता भएको छैन
काठमाडौँ । काठमाडौँ प्रहरीले निवर्तमान प्रधानन्यायाधीश गोपाल प्रसाद पराजुलीविरुद्ध कुनै पनि जाहेरी दरखास्त दर्ता नभएको जनाएको छ ।
महानगरीय प्रहरी परिसर काठमाडौँका प्रवक्ता प्रहरी नायव उपरीक्षक मोहन कुमार थापाले विज्ञप्ति जारी गर्दै विभिन्न मिडिया तथा सामाजिक सञ्जालमा प्रकाशित समाचारप्रति गम्भिर ध्यानाकर्षण भएको जनाएका हुन् ।
केही सञ्चारमाध्यमले निवर्तमान प्रधानन्यायाधीश पराजुलीविरुद्ध महानगरीय प्रहरी परिसर काठमाडौँमा उजुरी परेको समाचार प्रकाशित गरेको थियो ।
पत्रकार मदनबाबु भण्डारीले शैक्षिक प्रमाण र नागरिकताको बारेमा सत्य तथ्य छानविन गरी हदैसम्म कारवाही गर्न माग गरेको भन्दै सञ्चारमाध्यमहरुमा समाचार प्रकाशित भएको थियो ।
तर, महानगरीय प्रहरी परिसरले भने उक्त समाचारमा कुनै सत्यता नभएको र जाहेरी दरखास्त दर्ता नभएको स्पष्ट पारेको हो ।
