विप्लवकाे बन्दले काेशी अञ्चलका पाँच जिल्ला मारमा
विप्लव नेतृत्वको नेपाल कम्युनिष्ट पार्टीले आह्वान गरेको बन्दका कारण कोशीका पाँच जिल्लाको जनजीवन प्रभावित भएको छ।
बन्दका कारण बिहानैदेखि धनकुटासहित सुनसरी, मोरङ, तेह्रथुम र संखुवासभाका बजार, यातायात, कलकारखाना र शिक्षण संस्था ठप्प छन्।
बन्दका कारण धनकुटाबाट छुट्ने लामो तथा छोटा दूरीका कुनै पनि यातायातका साधन चल्न नसकेको जिल्ला ट्राफिक प्रहरी कार्यालयले जनाएकाे छ ।
आइतबार रामनवमीको अवसरमा सार्वजनिक बिदा परेकाले बन्दको असर विशेषगरी सवारी साधन सञ्चालन र बजार पसल बन्दको मारमा बढी परेको हाे । सडकमा नेता तथा कार्यकर्ताको उपस्थिति नदेखिए पनि बन्दको असर भने परेको छ।
यता नेकपाले शनिबार एक अपिल जारी गर्दै प्रहरीले नेता (कार्यकर्ता गिरफ्तार तथा धरपकड जारी राखेको भन्दै विरोधस्वरुप एकदिने बन्दको आयोजना गरिएको जनाएको छ।
प्रहरीले धनकुटाको हिलेबाट सोमबार राति केन्द्रीय सदस्य तथा कोशी ब्यूरो इन्चार्ज किरण राई, ब्यूरो सदस्य सागर लिम्बु, संखुवासभा इन्चार्ज समुल, सेक्रेटरी दिव्य बराल, धनकुटा इन्चार्ज माधव गौतम (आकाश), सेक्रेटरी नवराज भट्टराई र तेह्रथुम सेक्रेटरी कमला लिम्बूलाई प्रहरीले पक्राउ गरेको थियो।
उनीहरुलाई बैठक बसिरहेको अवस्थामा स्थानीय होटल हिले भ्यूबाट पक्राउ गरिएको थियो।
