चार दर्जनभन्दा बढी सदस्य रहने गरेको सचिवालयको आकार घटाएर २८ मा झारेका प्रधानमन्त्री केपी शर्मा ओलीले हालसम्म ८ जनालाई नियुक्ति दिएका छन् । यसपटक व्यक्तिको आचरण र पृष्ठभूमिसमेत विचार गरेरमात्र सचिवालयमा सहयोगी नियुक्त गर्ने प्रधानमन्त्री ओलीले बताउँदै आएका छन् ।

 

प्रमुख स्वकीय सचिवमा अहिलेसम्म कसैले नियुक्ति पाएका छैनन् । स्वकीय सचिवमा भने राजेश बज्राचार्य नियुक्त भइसकेका छन् ।

 

 

प्रधानमन्त्रीले हालसम्म मन्त्रीस्तरको सुविधा पाउने गरी एमाले पोलिटव्यूरो सदस्य विष्णु रिमाललाई मुख्य सल्लाहकार नियुक्त गरेका छन् । रिमालले प्रधानमन्त्रीको तर्फबाट आवश्यक समन्वय गर्दै आएका छन् ।

 

 

त्यस्तै सोमबारमात्र मन्त्रिपरिषद् बैठकबाट राज्यमन्त्रीसरहको सुविधा पाउने गरी अच्युत मैनालीलाई जनसम्पर्क सल्लाहकार नियुक्त गरेका छन् । एमालेका पूर्वकेन्द्रीय सदस्य मैनाली बारा १ बाट प्रतिनिधिसभा निर्वाचनमा पराजित भएका हुन् । उनी नेपाल ल क्याम्पसका पूर्वस्ववियु सभापति हुन् ।

 

त्यस्तै प्रेस सल्लाहकारमा डा. कुन्दन अर्याल नियुक्त भएका छन् । अर्याल बुधवार साप्ताहिकका पूर्वसम्पादकसमेत हुन् भने नेपाल टेलिभिनजका पूर्वकार्यकारी अध्यक्ष पनि ।

 

प्रधानमन्त्रीको प्रेस संयोजकमा पत्रकार चेतन अधिकारी नियुक्त भएका छन् । उनी यसअघि पनि ओली प्रधानमन्त्री हुँदा प्रेस संयोजक थिए भने ओली प्रधानमन्त्रीबाट हटेपछि पनि उनी नै सचिवालयमा प्रेस संयोजनको भूमिकामा थिए ।

 

अर्का पत्रकार रामशरण बजगाईंलाई सूचना सम्प्रेषकको नियु्क्ति दिइएको छ । त्यस्तै प्रधानमन्त्रीका कार्यक्रम तथा भेटघाटहरुको फोटो खिच्ने जिम्मासहित कृष्ण पौडेल नियुक्त भएका छन् । दीपेन्द्र दाहाल स्वकीय सचिवालयमा नियुक्त भएका छन् ।