प्रदेश सांसद्का लागि मासिक रु ४५ हजार तलब प्रस्ताव
कानून, न्याय तथा संसदीय मामिला मन्त्रालयले प्रदेश सांसद्हरुलाई मासिक रु. ४५ हजार तलब सहितको प्रस्ताव सात वटै प्रदेशमा पठाएको छ ।
मन्त्रालयले प्रदेशसभा सदस्यको पारिश्रमिक तथा सुविधा सम्बन्धमा व्यवस्था गर्न बनेको विधेयक प्रदेश सभामा पठाएको हो । उक्त विधेयकलाई प्रदेशसभाले स्वीकृत गरी लागू गर्न सक्नेछन् ।
पठाइएको विधेयकमा सभामुख, उपसभामुख, समिति सभापति, सत्ता पक्ष र विपक्षी दलका सचेतक, प्रदेश सदस्यको पारिश्रमिक र सुविधाको प्रस्ताव तोकिएको छ ।
प्रदेश सभामुखको मासिक रु ५३ हजार, उपसभामुखको रु ५० हजार तथा समिति सभापति र सचेतकको रु ४८ हजार रहने प्रस्ताव गरिएको छ । त्यस्तै, प्रदेशसभाका सदस्यको रु ४५ हजार पारिश्रमिक प्रस्ताव गरिएको छ ।
यसअघि मन्त्रालयले मुख्यमन्त्रीको रु ६० हजार ९७०, मन्त्रीको रु ५२ हजार, राज्यमन्त्रीको रु ४९ हजार र सहायकमन्त्रीको रु ४७ हजार सुविधा सहितको प्रस्ताव प्रदेश सभामा पठाइसकेको छ ।
