काठमाडौं । प्रधानमन्त्री केपी शर्मा ओली र उनका भारतीय समकक्षी नरेन्द्र मोदीबीच काठमाडौंदेखि रक्सौलसम्म विद्युतीय रेलमार्ग निर्माण गर्ने सहमति भएको छ । 

 

भारत भ्रमणमा रहेका प्रधानमन्त्री ओली र मोदीबीच भएको भेटवार्ताका क्रममा यस्तो सहमति भएको हो । सहमतिअनुसार पहिलो चरणमा  भारतको आर्थिक सहयोगमा नेपाल सरकारसँगको सहकार्यमा एक वर्षभित्र प्रारम्भिक सर्वेक्षण कार्य सम्पन्न गरिने छ भने त्यसलगत्तै आर्थिक पक्षबारे दुई देशबीच समझदारी गरेर रेलमार्गको परियोजना सम्पन्न गरिने भारतीय विदेशमन्त्रालयले जारी गरेको वक्तब्यमा उल्लेख छ । 

 

 वक्तब्यमा  नेपाल–भारत अन्तर्देशीय रेलसंजाल परियोजनाको पहिलो चरणको प्रगतीले आफूहरुलाई खुसी बनाएको भन्दै दुबै प्रधानमन्त्रीले जनकपुरदेखि जयनगर र बिराटनगरदेखि जोगबानीको रेलवे लाइन सन् २०१८ को अन्त्यसम्म पूर्ण हुने विश्वास व्यक्त गरेको पनि उल्लेख छ । 

 

 यस्तै बर्दिबास–बिजालपुरा–जयनगर र बिराटनगर–जोगबानीको रेल संजाल परियोजनालाई प्राथमिकताका हिसाबले पूरा गरिने वक्तव्यमा उल्लेख छ । 
काकडभित्ता–न्यू जलपाइगुरी, भैरहवा–नाउतान्वा र नेपालगञ्ज रोड–नेपालगञ्जको रेल संजाललाई भने दोस्रो चरणअन्तर्गत पूरा गरिने वक्तब्यमा उल्लेख छ । 

केपी शर्मा ओली नरेन्द्र मोदी काठमाडौंमा रेल विद्युतीय रेलमार्ग