काठमाडौं । सरकारले आगामी आर्थिक वर्षका लागि नीति तथा कार्यक्रम जेठ १ गते ल्याउने तयारी गरेको छ ।

 

यही वैशाख २३ देखि सुरु हुने संसद अधिवेशनबारे जानकारी दिन सभामुख कृष्णबहादुर महराले बुधबार आयोजना गरेको पत्रकार सम्मेलनमा यस्तो जानकारी दिएका हुन् ।

 

अधिवेशन सुरु भएको दोस्रो दिन नै संसद सन्चालन नियमावली पेस गर्ने कार्यसूची रहेको छ ।

 

यस्तै, वैशाख २४ देखि २७ गतेसम्म नियमावली पारित गर्ने, वैशाख २६ देखि तीनदिनसम्म प्रिबजेट छलफल गर्ने, जेठको पहिलो हप्ता नीति तथा कार्यक्रम पारित गर्ने र १५ जेठमा बजेट ल्याउने गरी काम अघि बढाइएको सभामुख महराले जानकारी दिए ।

 

असार मसान्तसम्म बजेट पारित गर्ने र योबीचमा नै संविधान कार्यन्वयनका लागि आवश्यक विधेयकहरुमाथि छलफल गर्ने जनाइएको छ ।

 

असार मसामन्तभित्र संसदीय समितिहरुलाई पूर्णता दिने गरी काम हुने पनि सभामुख महराले जानकारी दिए ।

 

भारतीय प्रधानमन्त्री नरेन्द्र मोदीले नेपाल भ्रमणकाक्रममा संसदलाई सम्बोधन कार्यक्रम नरहेको पनि सभामुख महराले प्रस्ट पारे ।

सभामुख कृष्णबहादुर महरा आर्थिक वर्ष