शिक्षा क्षेत्रमा निजी क्षेत्रले गरेको लगानीको विरोधी हाेइनाैँः प्रचण्ड
काठमाडौं । सत्तारुढ नेपाल कम्युनिस्ट पार्टी (ने क पा)का अध्यक्ष पुष्पकमल दाहाल ‘प्रचण्ड’ले आफ्नो बाँकी जीवन मुलुकको विकास, निर्माण र समृद्धिका लागि समर्पित गर्ने घोषणा गरेका छन्।
अध्यक्ष प्रचण्डले निजी–सार्वजनिक–सहकारी क्षेत्रको सहकार्यमा मुलुकलाई समृद्ध बनाउने योजना पनि अघि सारे। उनले पछिल्ला एक दशक शान्ति र संविधान निर्माणमा आफूले बिताएको उल्लेख गर्दै अब मुलुकको विकास, निर्माण र समृद्धिको लागि जीवन समर्पित गर्ने संकल्प रहेको बताए।
शनिबार प्याब्सनद्वारा काठमाडौंमा आयोजित एक कार्यक्रममा बोल्दै प्रचण्डले आफूहरू शिक्षा क्षेत्रमा निजी क्षेत्रले गरेको लगानीको विरोधी नभएको पनि स्पष्ट पारे। अध्यक्ष दाहालले नेपालको शिक्षामा निजी क्षेत्रले गरेको मिहिनेतको प्रशंषा गर्दै गुणस्तरीय शिक्षामा अझै जोड दिन पनि आग्रह गरे।
अध्यक्ष दाहालले आफूले मुलुकको इतिहास र राजनीतिक दर्शनको अध्ययन तथा संघर्ष र लडाइँमा २ दशक बिताएको पनि स्मरण गरे। उनले मुलुकको समृद्धिका लागि शिक्षा क्षेत्रमा आवश्यक लगानी भित्र्याउने व्यवस्थासहित संविधान जारी गरिएको दाबी गरे।
अध्यक्ष प्रचण्डले ले जीवन उपयोगी शिक्षामा सबैले जोड दिनुपर्ने आवश्यकता पनि औंल्याए। उनले शिक्षा, स्वास्थ्य र रोजजारीलाई सर्वसुलभ र सहज बनाउने प्रतिवद्धता पनि व्यक्त गरे।
प्रचण्ड शिक्षा
