विप्लवको हुँकार : ‘केपी–बादल कम्पनी’सँग डराउँदैनौँ, प्रतिबन्धसामु झुक्दैनौँ
काठमाडौं : नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले जनता र राष्ट्रको लागि जस्तोसुकै कठिन यात्रा गर्न तयार रहेकाले प्रतिबन्धसामु नझुक्ने बताएका छन्।
आफ्नो पार्टीलाई प्रतिबन्ध लगाउने निर्णय हतास मानसिकताको उपज भएको बताउँदै उनले यो केपी–बादल कम्पनीको आपराधिक र षड्यन्त्रकारी निर्णय भएको दाबी गरे । गत फागुन २८ गतेको मन्त्रिपरिषद् बैठकले नेकपालाई कुनै गतिविधि गर्न नदिने गरी प्रतिबन्ध लगाउने घोषणा गरेको थियो ।
‘जनयुद्धका तत्कालिन नेतृत्व गरेका प्रचण्डहरू तुच्छ स्वार्थका लागि कांग्रेस, एमाले र भारतसँग घाँटी जोड्न पुगेदेखि हामीहरूले जनता र राष्ट्रको भविष्यको लागि क्रान्तिको झण्डा निरन्तर उठाउँदै २०७२ मा घोषित संविधानलाई अस्वीकार गर्दै आएका छौं’–विप्लवद्वारा जारी प्रेस विज्ञप्तिमा उल्लेख गरिएको छ ।
चुनाव बहिष्कारयता राज्यबाट आफ्नो पार्टीका तीन कार्यकर्ताको हत्या भएको र तीन दर्जनभन्दा बढीलाई घाइते बनाएको दावी गर्दै विज्ञप्तिमा थपिएको छ–‘केपी–बादल कम्पनी’ देश र जनताविरुद्ध अपराधिक षडयन्त्र गरिरहेकाले त्यसप्रति गम्भीर ध्यान दिन बुद्धिजीवि, मानवअधिकार, पत्रकार, लोकतान्त्रिक, कम्युनिस्ट तथा देशभक्त शक्ति, प्रहरी र सेनासँग विशेष आग्रह गर्दछौँ ।
उनले विज्ञप्तिमार्फत् अरुण ३ जलविद्युत आयोजना, नीजि क्षेत्रको मोबाइल सेवा प्रदायक कम्पनी एनसेल र म्यानपावर कम्पनीमाथिको आक्रमणको जिम्मा लिएका छन् । चन्दा उठाउनु नैसर्गिक अधिकार भएको दावी विज्ञप्तिमा गरिएको छ । यो खबर आजको नेपाल समाचारपत्र दैनिकबाट लिइएको हो ।
नेत्र विक्रम चन्द विप्लव
