काठमाडौं । नेपाल कम्युनिस्ट पार्टीका अध्यक्ष पुष्पकमल दाहाल प्रचण्ड धर्मपत्नी सीता दाहालसहित स्वदेश फिर्ता हुने भएका छन्। गत आइतबार श्रीमती सीता दाहालको उपचारका लागि अमेरिका उडेका अध्यक्ष प्रचण्ड बुधबार स्वदेश फिर्ता हुन लागेका हुन्।

 

१० दिनको अमेरिका बसाइँपछि बुधबार नेपाल फर्किन लागेका प्रचण्डकी स्वकीय सचिव गंगा दाहालले दिइन्। उनले सीताको वासिंटनस्थित मेडिस्टार अस्पताल र बरमिंघमस्थित युएबी अस्पतालमा उपचार भएको जानकारी दिइन्। प्रचण्डकी छोरीसमेत रहेकी गंगाले सामाजिक सञ्जाल फेसबुकमा उल्लेख गरेअनुसार उपचारमा संलग्न चिकित्सकहरूले उनको स्वास्थ्यमा क्रमिक सुधार आउने बताएको छन्।

 

'आमाको उपचारमा सहयोग गर्नुहुने राजदुत डा. अर्जुन कार्की लगायत सबैमा हार्दिक आभार र आमाको स्वास्थ्य जाँच वासिंटनस्थित मेडिस्टार हस्पिटल र बरमिंघमस्थित युएबी हस्पिटलमा भएको छ, डक्टरहरुको अनुसार आमाको स्वास्थ्यमा सुधार आउने विश्वास दिलाएका छन', गंगाले सामाजिक सञ्जाल फेसबुकमा उल्लेख गरेकी छन्।

 

सीता पार्किन्सनको बिरामी छिन्। उनी सुगर र उच्च रक्तचापबाट पनि पीडित छिन्। सीतालाई उपचारका लागि यसअघि भारत र थाइल्याण्ड लगायतका अस्पतालमा लगिएको थियो। त्यहाँ उपचार गर्दा पनि निको नभएपछि अमेरिका लगिएको हो। अमेरिका प्रस्थान गर्नुअघि त्रिभुवन अन्तर्राष्ट्रिय विमानस्थलमा उनले संचारकर्मीमाझ पत्नी सीताले पनि आफूले एक पटक अमेरिका गएर स्वास्थ्य उपचार गर्ने मनसाय राखेपछि आफू उपचारका लागि अमेरिका जान लागेको बताएका थिए।

 

अमेरिकी बसाइँको क्रममा प्रचण्डले अमेरिकी उच्च अधिकारी तथा नेपालीहरूसँग भेटघाट गरेका थिए। त्यस्तै, प्रचण्डलाई अमेरिकास्थित नेपाली दूतावासका राजदूत डा. अर्जुन बहादुर कार्कीलगायतका कर्मचारीले प्रचण्डको स्वागत गरेको थियो।

प्रचण्ड