काठमाडौं। नेपाल कम्युनिष्ट पार्टी (नेकपा) का अध्यक्ष तथा पूर्वप्रधानमन्त्री पुष्पकमल दाहाल 'प्रचण्ड' ले एकले अर्कालाई कमजोर पार्नुको सट्टा सबैले आफ्नो भुमिका निर्वाह गर्नुपर्नेमा जोड दिएका छन् ।

 

शुक्रबार बेलुका काठमाडौंमा आयोजित एक कार्यक्रमलाई सम्बोधन गर्दै अध्यक्ष प्रचण्डले नेताले आफ्नो काम र अरु सबैले आफ्नो काम गर्दै एकअर्काका बीचमा सकरात्मक सहयोग र सहकार्य गर्नुपर्ने आवश्यकता औंल्याएका छन् ।

 

कार्यक्रममा सहभागीले आर्थिक गतिविधि, विकास र निर्माणलाई जति जोड दिनुपर्ने त्यति दिइएको छैन राजनीति मात्र भयो भन्दै राखेको जिज्ञासामा अध्यक्ष प्रचण्डको जवाफ थियो, "धेरै विकास भएका देशमा इतिहासमा हामी जस्तो राजनीति सयौं वर्ष गरेर बिताएका छ्न । तत्पश्चात मात्र अन्तिम सार निकालेर प्रगतिमा पुगेका छन् । तर हामीले छोटो समयमा राजनीतिलाई स्थिर बनाएका छौ र आर्थिक विकासमा केन्द्रित हुने जमर्को गरेको हुनाले निराश हुनुपर्ने स्थिति छैन ।"

 

मुलुकले प्राप्त गरेको परिवर्तित परिस्थितिमा विकासमै केन्द्रित हुनुपर्नेमा अध्यक्ष प्रचण्डको जोड छ । उनले भने, "एक पटक अवसर आएको छ यसको सदुपयोग गर्नुपर्छ । कुरा सबैले राम्रो गर्न जान्ने भयौ तर राम्रो काम गर्ने भएनौ । कुरा अलि नराम्रो गरे केही बिग्रिदैन तर काम चाहीँ राम्रो गर्ने भइयो भने सुधार त्यहीबाट सुरु हुने हो । सुशासनका कुरा हामी धेरै गर्छौ तर हामी कहाँ तलदेखि माथिसम्म कुशासन गर्ने प्रवृति जबरजस्त कायम छ ।"

 

अध्यक्ष प्रचण्ड थप्छन्, "भ्रष्टाचारमा शुन्य सहनशीलता भन्छौ तर जीवन व्यवहारमा हेर्ने हो भने झनै बढेको छ । विकास निर्माणमा पनि एकीकृत राष्ट्रिय संकल्प अझै आइसकेको छैन् । ठुल्ठुला घोषणा गरिएपनि व्यवहार ल्याउन सकिएको छैन् । कहाँबाट कसले सुरु गर्ने भन्ने हो भने राजनीति नेतृत्व र सरकारले गर्नुपर्छ । हामीले राष्ट्रलाई आउने केही वर्षमा समृद्धिको यात्रामा ल्याउन सकेनौ भने भयानक राजनीतिक अराजकता हुन्छ ।"

 

"हामीले पहिला टाउकोलाघ ठिक गर्नुपर्यो । सोच्ने क्षमता सुधार्नुपर्नेछ । जनातको सेवा गर्ने र समृद्धिका लागि इमान्दार काम गर्ने जनशक्ति चाहिएको छ । अहिले राजनीतिक नेतृत्वले विकास र समृद्धि भनेको छ  र नीजि क्षेत्रले पनि त्यही भनिरहेको छ । हामी सबैले समृद्धिका कुरा गर्न थालेका छौ । सरकारले पनि समृद्ध नेपाल र सुखी नेपालीको नारा अघि सारेको छ । यसका लागि सबै क्षेत्र मिलेर जानुपर्छ ।" अध्यक्ष प्रचण्डले भने ।