प्रचण्डले सि जिनपिङलाई पठाएको पत्र स्तरहीन
दुई दुई पटक प्रधानमन्त्री भैसकेका नेपाल कम्युनिष्ट पार्टी (नेकपा) का अध्यक्ष पुष्पकमल दाहाललाई कूटनीति के हो भन्ने अझै ज्ञान नभएको फेरि छताछुल्ल भएको छ ।
दाहालले चिनियाँ राष्ट्रपति सी चिनफिङलाई पत्र लेखेको खुलासा भएपछि उनको कूटनीतिको कच्चापनको धोती फेरि फुस्किएको हो ।
सामान्यतः कूटनीतिको शिष्टाचारमा राष्ट्रपतिलाई देशका तर्फबाट पत्र लेख्ने हैसियत र अधिकार राष्ट्रपतिमा रहन्छ । चिनियाँ राष्ट्रपति कार्यकारीसमेत पनि भएकाले नेपालका प्रधानमन्त्रीले पनि यस्तो पत्र लेख्न सक्छन् । तर पुष्पकमल दाहाल एउटा पार्टीका अध्यक्षसम्म हुन् उनले यसरी लेखेको पत्र अनधिकृत रहेको एक कूटनीतिज्ञले बताए ।
दुई दुई पटक प्रधानमन्त्री भैसकेका दाहाललाई प्रोटोकोल थाहा नभएको त पक्कै होइन होला तर उनले यो आफू पपुलिष्ट अर्थात् लोकप्रिय बन्ने लोभमा गरेको ति कूटनीतिक मामलाका जानकारले बताए ।
राष्ट्रप्रमुख वा कार्यकारी तहबाट यस्तो पत्र लेख्दा पनि सिधै लेख्ने नभई परराष्ट्र मन्त्रालयलाई जानकारी दिएर लेख्नुपर्ने कूटनीतिक प्रचलन रहेको हुन्छ, उनले भने ।
दाहालको यस्तै कच्चापनका कारण उनी यसअघि पनि पटक पटक विवादमा आइसकेका छन् । भेनेजुयला प्रकरणमा उनले लेखेको चिठी यसैगरी विवादमा आएको थियो भने अमेरिका भ्रमण ताका पनि उनी विवादमा तानिएका थिए ।
नेकपा अध्यक्ष दाहालले चिनियाँ राष्ट्रपति सीलाई लेखेको सोही चिठी यतिबेला सामाजिक सञ्जालमा भाइरल पनि बनेको छ ।
आइतबार पूर्वप्रधानमन्त्री दाहालले चीनका राष्ट्रपति सीलाई एक पत्र लेख्दै कोरोना भाइरस नियन्त्रण गर्न सफल भएकामा बधाई दिएका थिए । उनले कोरोना भाइरसको उपचारमा नेपाललाई सघाउन पनि आग्रह गरेका थिए ।
तर उनले लेखेको पत्रमा भएका कूटनीतिक र भाषागत कमजोरीलाई औल्याउँदै अहिले त्यो पत्र सामाजिक सञ्जालमा भाइरल भएको छ ।
