लकडाउनको ढाँचा फेर्ने तयारीमा सरकार, कस्ताे हाेला अबकाे लकडाउन ?
काठमाडौं । बिज्ञहरुको सुझावका आधारमा सरकारले लकडाउनको मोडालिटी परिवर्तन गर्ने तयारी गरेको छ । संस्कृति पर्यटन तथा नागरिक उड्ययनमन्त्री योगेश भट्टराईले अब विशेषज्ञहरुको राय लिएर मोडालिटी बन्ने र त्यसकोआधारमा सरकार अघि बढ्ने बताए । मन्त्रिपरिषद्ले शनिबार जेठ मसान्तसम्म लकडाउन लम्ब्याउने निर्णय गरेसँगै यो अवधिमा नयाँ ढाँचा तयार गर्न कोभिड–१९ संक्रमण रोकथाम तथा नियन्त्रण उच्चस्तरीय समन्वय समितिलाई निर्देशन दिएको छ ।
सोही निर्देशनअनुसार समिति र कोभिड–१९ संकट व्यवस्थापन केन्द्र (सीसीएमसी) ले नयाँ ढाँचा बनाइरहेका छन् । ‘लकडाउन अब क्रमश: सामान्य बनाउँदै जानुपर्ने आवश्यकता बोध भएको छ,’ उच्चस्तरीय समन्वय समितिका सदस्य संस्कृति, पर्यटन तथा नागरिक उड्डयनमन्त्री योगेश भट्टराईले भने, ‘विशेषज्ञहरूको राय लिएर नयाँ मोडालिटी बन्छ र त्यसका आधारमा सरकार अघि बढ्छ ।’
पछिल्लो पटक सरकारले लकडाउनको अवधि लम्ब्याएर जेठ ३२ गतेसम्म पुर्याएको छ । लामो समय लकडाउन हुँदा जनजीवन समेत प्रभावित बन्न थालेको छ । प्रहरीले सवारी साधनको जाँचलाई कडाई गरेको छ । अत्यावस्यक सेवा र पास नलिइ सञ्चालनमा आएका सवारी साधनलाई नियन्त्रणमा लिई कारबाही गरिएको छ ।
यो अवधिमा अत्यावश्य खाद्य सामग्री र तरकारीका पसलहरु बिहान र बेलुका मात्र खुल्ने गरेका छन् । मानिसहरु सामाजिक दुरीलाई कायम गर्दै आफ्नो घर नजिकको पसल सम्म पुगेर किनमेल गर्ने गरेका छन् ।
लकडाउन चैत ११ मा सुरु हुँदा मुलुकमा कोभिड–१९ संक्रमित २ जना थिए । लकडाउनको ७० औं दिन अर्थात सोमबार यो संख्या १ हजार ८११ पुगेको छ । यहीबीचमा ८ जनाको संक्रमणले मृत्यु भइसकेको छ । यसले लकडाउन मात्रै कोभिड–१९ संक्रमण रोकथामको उपाय होइन भन्ने प्रष्ट्याएको छ ।
यो कुरा विज्ञहरुले बताउँदै आएपनि सरकारले लकडाउनलाई निरन्तरता दिँदै आएको छ । उद्योगी व्यवसायी लगायतले लकडाउन खुकुलो बनाउँदै व्यवसाय सञ्चालनको वातावरण बनाउन माग गर्न थालेका छन् । सबैतिरबाट दवाव पर्न थालेपछि भने सरकारले लकडाउनको ढाँचा बदल्ने तयारी थालेको हो ।
