एजेन्सी– अस्ट्रेलियन युवा क्रिकेटर फिलिप ह्युजको निधन एउटा दुःखद दुर्घटना भएको भन्दै न्यु साउथ वेल्सको कर्नर कोर्टले ह्युजको परिवारले हालेको मुद्धा खारेज गरेको छ ।

सो अदालतले ह्युजको निधन क्रिकेटमा प्रयोग गरिने साधनको कमजोरीले भन्दा पनि दुःखद घटना भएको बताएको छ । सिडनी क्रिकेट मैदानमा दक्षिणी अस्ट्रेलियाको घरेलु खेलका दौराना ह्युजको २०१४ नोवेम्बर २५ तारिखमा बलले लागेर घाइते भएका थिए ।

टाउकोको पछाडि गम्भीर चोट लागेको कारण उनको उपाचारका क्रममा दुई दिन पछि निधन भएको थियो । उनको निधनपछि क्रिकेटमा सुरक्षाको विषयमा ठूलो बहस पनि चलेको थियो ।

सोहि क्रममा उनको परिवारले सुरक्षित साधन नभएका कारण ह्युजको मृत्यु भएको भन्दै अदालतमा रिट दायर गरेका थिए । करीव दुई बर्षको अनुसन्धान पछि अदालतले दुखद दुर्घटना भएको निस्कर्ष निकालेको छ । उनको निधनपछि क्रिकेटमा प्रयोग गरिने हेलमेटका बारेमा निकै नकारात्मक चर्चा चलेको थियो ।