मंसिर - ३ । कृषकका सङ्घसङ्गठनका अगुवा तथा सरोकार भएकाहरुले तरकारीमा बिचौलियाका कारण किसान र उपभोक्ता दुवै मर्कामा परेका छन् । राष्ट्रिय कृषि सञ्जालले शुक्रबार आयोजना गरेको कार्यक्रममा सहभागी वक्ताले बिचौलिया नियन्त्रण नगर्दासम्म किसानले बेच्ने र उपभोक्ताले किन्ने मूल्यका बीचमा भएको अन्तर कम गर्न नसकिने बताए । नेपाल कृषि सङ्घका सभापति भानु सिग्देलले किसानले रु २० मा बेचेको तरकारी उपभोक्ताले रु १०० मा किन्नुपरेको बताए । उनले भने, “किसानले रु ४० पाउने र उपभोक्ताले रु ६० मा किन्न पाउनुपर्छ ।” बिचौलिया नियन्त्रण नगर्दासम्म समस्या नहट्ने उनकाे भनाइ छ । राष्ट्रिय किसान सञ्जाल (क्रान्तिकारी)का सचिव नयन्द्र खड्काले पुँजीवादले त यसलाई सकारात्मक रुपमा हेर्ला तर समाजवादका अनुसार यो तल्लो वर्गमाथिको अन्याय हुने बताए । कृषि विकास मन्त्रालयका सहसचिव लेखनाथ आचार्यले तरकारी आयात कम मात्रै रहेको बताए । उनले भने,“आगामी एक दुई वर्षमा नै आत्मनिर्भर हुने अवधारणा मन्त्रालयको छ । गत वर्षदेखि लागू भएको कृषि विकास रणनीतिले व्यावसायिक कृषिखेतीलाई जोड दिएको छ । ” राष्ट्रिय किसान महासङ्घका महासचिव सीमा रिजालले तरकारीको न्यूनतम बिक्री मूल्य तोक्दा मात्रै किसानलाई सहज हुने बताए । रासस

Tarkari Maffiya