मंसिर–४ । जारी प्रिमियर लिगको १२औँ हप्ताको खेल आजबाट सुरु हँुदै छ । ११औँ हप्ताको अन्तिम खेल नोभेम्बर ६ मा भएपछि नोभेम्बर १९ बाट खेल सुरु हुन लागेको हो ।

यो हप्ताको पहिलो खेल आज म्यानचेस्टर युनाइटेड र आर्सेनलबीच हुनेछ । नेपाली समयअनुसार यी दुईको खेल युनाइटेडको गृहमैदान ओल्ड ट्राफोर्डमा साँझ ६ः१५ बाट सुरु हुनेछ । आर्सेनल ११ खेलबाट ७ जित र १ हारबाट २४ अंकका साथ चौथो स्थानमा छ भने, युनाइटेड ११ खेलबाटै ५ जित र ३ हारसँगै १८ अंकका साथ छैठौँ स्थानमा रहेको छ ।

यस्तै शनिबारनै राति ८ः ४५ मा विभिन्न ठाउँमा गरी छ खेल हुँदैछन् । जसमा क्रिष्टल प्यालेसविरुद्ध म्यानेचेस्टर सिटी, साउथयाम्पटनविरुद्ध लिभरपुल, वाटफोर्डविरुद्ध लिसेस्टर सिटी , एभरटोनविरुद्ध स्वान्सिय सिटी, सण्डरल्याण्डविरुद्ध हल सिटी र स्टोक सिटीविरुद्ध बोर्नमाउथको खेल हुदैँछन् । यस्तै टोटनहामविरुद्ध वेष्ट हामको खेल भने ११ः १५ मा हुनेछ ।

लिगको अंक तालिकामा लिभरपुल ११ खेलबाट २६ अंकका साथ शीर्ष स्थानमा छ भने चेल्सी २५ अंकका साथ दोस्रो र म्यानचेस्टर सिटी २४ अंकका साथ तेस्रो स्थानमा छ ।