मंसिर–१७ । वैदेशिक रोजगारीमा जाने श्रमिकलाई दक्ष बनाउन सकेमात्रै सुरक्षित एवम् सहज आप्रवास हुनेमा आयोजित कार्यक्रमका वक्ताले जोड दिएका छन् । युरोपेली सङ्घ र दक्षिण एसियाली अध्ययन केन्द्रको संयुक्त आयोजना गरेको ‘दक्षिण एसियामा सहज एवम् सुरक्षित श्रमिक आप्रवास’ विषयक कार्यशालाका सहभागीले दक्षिण एसियाबाट वैदेशिक रोजगारीमा जाने श्रमिक अदक्ष भएकै कारण न्यून तलब पाउनुपरेको तथा जोखिमयुक्त काम गर्नु परिरहेको बताए । राष्ट्रिय योजना आयोगका सदस्य डा स्वर्णिम वाग्लेले दक्षिण एसियाबाट वैदेशिक रोजगारीमा जाने श्रमिकको सङ्ख्या पछिल्लो वर्षमा बढ्दै गएकाले स्वदेशमै वैकल्पिक रोजगारीको विकल्पबारे योजना बनाउन आवश्यक रहेको बताए । उनले श्रमिकले पठाएको विप्रेषणको उचित प्रयोग गर्न सकेमात्रै त्यसले फाइदा दिन सक्ने र नेपालले पनि ‘रेमिट हाइड्रो’को अवधारण ल्याएको जानकारी दिए । नेपालका लागि युरोपेली सङ्घका राजदूत रिन्चे टिरिङले दक्षिण एसियामा गरिबी निवारणका लागि वैदेशिक रोजगारीले योगदान गरे पनि त्यसलाई व्यवस्थित बनाउन आवश्यक रहेकामा जोड दिए । आप्रवासबारे विश्वस्तरका प्रभावकारीे योजना बनाउन आवश्यक रहेको उनको भनाइ छ । दक्षिण एसियाली क्षेत्रीय सहयोग सङ्गठन (सार्क) सचिवालयका निर्देशक रीता धितालले दुई वर्षअघि काठमाडौँमा सम्पन्न १८औँ सार्क सम्मेलनले वैदेशिक रोजगारीलाई सुरक्षित र व्यवस्थित बनाउने विषयमा घोषणापत्र पारित गरेको र सोहीअनुसार कार्ययोजना बनाइरहेको जानकारी दिए । दक्षिण एसियाली अध्ययन केन्द्रका निर्देशक निश्चलनाथ पाण्डेले आप्रवास विश्वभर चुनौतीको विषय बन्दै गएको र नेपालबाट हजारौँ श्रमिक बाहिरिने गरेकाले कार्यशालाको आयोजना गरिएको बताए । कार्यशालामा विभिन्न मुलुकबाट आएका विज्ञले आप्रवासका विषयमा केन्द्रित रहेर कार्यपत्र प्रस्तुत गरेका थिए ।

abroad job qualified