मंसिर–१८ । विश्व फुटबलको सर्वोच्च निकाय फिफाले प्रदान गर्ने उत्कृष्ट वर्ष खेलाडीको लागि ३ खेलाडीको सार्वजनिक गरिएको छ । अवार्डका लागि क्रिष्टियानो रोनाल्डो, एन्टोनी ग्रिजम्यान र लियोनल मेस्सी अन्तिम तीनको मनोनयनमा पर्न सफल भएका छन् । मनोनयनमा परेका २३ खेलाडीबाट राष्ट्रिय टिमका कप्तान तथा प्रशिक्षक, छनौटमा परेका २०० भन्दा धेरै पत्रकार तथा फिफा डट कमका समर्थकले गरेको भोटका आधारमा रियल मड्रिडका रोनाल्डो, एथ्लेटिको मड्रिडका ग्रिजम्यान र बार्सिलोनाका मेस्सी अन्तिम तीनमा पुगेका हुन् । यस वर्ष रोनाल्डोले पोर्चगललाई ऐतिहासिक युरोकपको उपाधि र रियल मड्रिडलाई च्याम्पियन्स लिगको उपाधि दिलाए । यस्तै मेस्सीले अर्जेन्टिनालाई कोपा अमेरिकाको फाइनलमा पुर्याए भने बार्सिलोनालाई ला लिगाको उपाधि दिलाउन महत्वपूर्ण भूमिका खेलेका थिए । यस्तै फ्रान्सका ग्रिजम्यानले यूरो २०१६ को सर्वाधिक गोलकर्ता बने र उनको टोलीमा पनि उत्कृष्ट प्रदर्शन रहेकाले अन्तिम ३ मा पर्न सफल रहेका छन् । फिफाको बालोन डि ओरसँगको सहकार्य टुटेपछि फिफा बालोन डि ओरको सट्टा फिफा वर्ष खेलाडी अवार्ड निर्णय गरेको हो । विजेताको घोषणा आउँदो जनवरी ९ मा हुनेछ ।