मंसिर–२५ । स्टार स्ट्राइकर लियोनल मेस्सीले बार्सिलोनासँगको नयाँ सम्झौताको विषयमा छलफल सुरु गरेका छन् । यस्तै अर्का स्ट्राइकर लुइस स्वारेज क्लबसँग सन् २०२२ सम्मको सम्झौताको तयारीमा छन् ।

अर्जेन्टिनी खेलाडी मेस्सीको क्लबसँगको सम्झौता सन् २०१८ सम्मको लागि यसअघि नै गरिसकेका छन् । अहिले थप समयका लागि सम्झौता गर्ने विषयमा छलफल भइरहेको हो । क्लबमा प्रशिक्षक लुइस एनरिकले मेस्सीसँग छलफल सुरु भएको र यो निकै खुसीको कुरा रहेको बताएका छन् ।

यस्तै उरुग्वेका स्वारेजसँग पनि नयाँ सम्झौता हुने बार्सिलोनाका अध्यक्ष जोसेप मारिया बार्टोमेउले बताए । स्वारेजले अघिल्लो लिग सिजनमा युरोपियन गोल्डेन सूज जितेका थिए । उनले लिगमा ४० गोल आफ्नो नाममा दर्ता गरेका थिए । अध्यक्ष बार्टोमेउले यो विषय फुटबल फ्यानको लागि क्रिस्टमसको उपहार हुने भनेर उरुग्वेको रेडियोमा भनेका छन् ।