पुस–१५ । दुवै मिर्गौलाले काम गर्न छाडेपछि उपचारका लागि आर्थिक अभाव झेलिरहेका गुल्मीका सूर्य घिमिरेलाई काठमाडौँ उपत्यकाका प्राविधिक क्याम्पसका नेपाल विद्यार्थी सङ्घले आर्थिक सहयोग गरेको छ । आर्थिक सङ्कलन अभियान र वृत्तचित्र प्रदर्शनी गरेर उठेको रु एक लाख ५० हजार पीडित घिमिरेलाई शुक्रबार इकाइ सभापतिहरुले संयुक्तरुपमा हस्तान्तरण गरेका हुन् । कार्यक्रम संयोजक एवम् नेविसङ्घका नेता सुमधुर बरालले विद्यार्थीले आफ्नो खर्च बचाएर मिर्गौला रोगीलाई बचाउन सहयोग गरेको बताए । उनले जीवन भट्टराईद्वारा निर्देशित शिक्षाको खोजी नामक वृत्तचित्र प्रदर्शन गरेर टिकटबापत उठेको रकम सहयोग गरिएको जानकारी दिए । मिर्गौला प्रत्यारोपण गराउन पैसा अभाव भएपछि प्राविधिक क्याम्पसका विद्यार्थीले उपचारका लागि सहयोग अभियान सञ्चालन गरी आर्थिक सङ्कलन गरेको पनि जानकारी दिए । पीडितलाई आर्थिक सहयोग चाहनेले ग्लोबल आइएमई बैंकको खाता नम्बर ०८०७०१००१०२९ मा पैसा जम्मा गर्न विद्यार्थी नेता शिव भट्टराईले अनुरोध गरेका छन् । रासस

नेपाल विद्यार्थी सङ्घ मिर्गौला