असार - २४  बंगलादेशबिरुद्धको दुई अन्तराष्ट्रिय मैत्रीपूर्ण फुटबल खेलका लागि नेपाली राष्ट्रिय टोलीको घोषणा गरिएको छ । नेपाली राष्ट्रिय टोलीका मूख्य प्रशिक्षक ग्याटुको कोजीले अनिल गुरुङको कप्तानीमा २१ सदस्यीय नेपाली टोलीको घोषणा गरेका हुन । हाल प्रशिक्षणमा रहेका २९ खेलाडीमध्येबाट २१ जनाको अन्तिम छनौट गरिएको एन्फाले जानकारी दिएको छ । नेपालले बंगलादेशसँग आगामी असार ३१ र साउन २ गते ढाकामा दुई अन्तराष्ट्रिय मैत्रीपूर्ण फुटबल खेल्दैछ । यो खेल आगामी नोभेम्बर २ देखि १५ सम्म हुने एएफसी सोलिडारिटी कपको तयारीको रुपमा खेल्न लागिएको हो । शुक्रबार घोषणा गरिएको अन्तिम छनौटमा ३ गोलकिपर, ९ डिफेण्डर, ५ मिडफिल्डर र ४ स्ट्राइकर छन् । टोलीको प्रशिक्षकमा राजुकाजी शाक्य र गोलकिपर प्रशिक्षकमा उज्वल मानन्धर छन् । टोलीको कप्तानीको जिम्मेबारी यसपटक स्ट्राइकर लाई दिइएको छ । नेपाली टोलीमा अनिल गुरुङसंगै फरवार्डतर्फ नवयुग श्रेष्ठ, भरत खवास, रञ्जन विष्ट छनौटमा परेका छन् । त्यस्तै, गोलकिपरमा किरण कुमार लिम्बु, विकेश कुथु र बिशाल श्रेष्ठ टिममा परेका छन् । डिफेण्डरहरुमा बिराज महर्जन, अनन्त तामाङ, दिनेश राजबंशी, आदित्य चौधरी, जीतेन्द्र कार्की, देभेन्द्र तामाङ, रविन श्रेष्ठ, रञ्जित धिमाल र मानबहादुर तामाङ टिममा रहेका छन भने मिडफिल्डरहरुमा सुजल श्रेष्ठ, बिशाल राई, राजेन्द्र रावल, अञ्जन विष्ट र सुमन लामा रहेका छन् ।