साउन - ४ । सामाजिक संस्था ‘क्रोधरहित संसार’ले यस वर्षको ‘दि डिन अफ इन्टरनेसनल पिस प्राइज–२०१६’ प्रा डा मुरारीप्रसाद रेग्मीलाई प्रदान गर्ने भएको छ । राष्ट्रिय र अन्तर्राष्ट्रिय क्षेत्रमा मनोविज्ञान क्षेत्रबाट शान्ति स्थापनामा योगदान गरेका व्यक्तिलाई सो पुरस्कार प्रदान गरिन्छ । प्रा डा तुलसीराम वैद्यको संयोजकत्वमा रहेको चयन समितिको सिफारिसमा सो निर्णय भएको ‘क्रोधरहित संसार’ का अध्यक्ष देशमर्दन बस्न्यातले जानकारी दिए । यही साउन ८ गते ग्लोबल पिस फाउन्डेसन र ‘क्रोधरहित संसार’ ले काठमाडौँमा आयोजना गर्ने छैटौं अन्तराष्ट्रिय सम्मेलनमा सो पुरस्कार प्रदान गरिनेछ । सम्मेलनमा नेपाल, अमेरिका, अष्ट्रिया, युक्रेन, जापान, श्रीलङ्का, भारतलगायत सात देशका बुद्धिजिबी तथा प्राध्यापकको सहभागिता हुनेछ । सम्मेलन बृहत्तर शान्ति, संवेगात्मक साक्षरता, सांस्कृतिक विविधता, सद्भाव र आदत् व्यवस्थापन रहेको छ । रासस