साउन - १५ । चलचित्र ‘मञ्जरी’ मार्फत कलिउडमा डेब्यु गरेका नायक गौरव पहारी एकाएक चर्चामा आए । तर, त्यसपछि आएका उनका चलचित्रले उनलाई मञ्जरीले जस्तो राहत दिएन । तर, उनको अभिनयको चर्चा कलिउडमा नभएको होइन ।
यस्तो लाग्दैछ, नायक गौरव पहारी अब खलनायकको बाटोतर्फ लाग्दैछन् । गौरवले केही समय अगाडि काठमाण्डौमा आयोजित चलचित्र ‘ग्याङस्टार ब्लूज’को कार्यक्रममा आफू नायक भन्दा पनि भूमिका अनुसार अगाडि बढ्ने बताएका थिए ।
चलचित्र ‘मञ्जरी’मा उनले ‘फोहोरी केटो’ बनेर निर्वाहा गरेको भूमिकालाई पनि खुबै रुचाइएको थियो । चलचित्र ‘ग्याङस्टार ब्लूज’मा गौरव खलनायकको भूमिकामा देखिदैछन् । उनले यो चलचित्रको पत्रकार सम्मेलनमा भूमिका मन परेकाले काम गरेको बताएका थिए ।
अब, उनै गौरव श्याम अर्यालको प्रस्तुती र रतन थापाको निर्माणमा बन्न लागेको चलचित्र ‘मरिना’मा पनि खलनायकको भूमिकामा देखिनेछन् । यो चलचित्रमा उनले नायक आर्यन सिग्देलसँग दुश्मनी मोल्नुपर्नेछ ।
चलचित्रमा गौरव ‘विरेन’ नाम गरेका प्रोफेसरको भूमिकामा देखिन लागेको श्यामले जानकारी दिएका छन् । गौरव चलचित्रमा नायक भन्दा पनि भूमिका अनुसार सुहाउने पात्रको रुपमा हिट छन् । यो चलचित्रको छायांकन सुरु हुने भनिएतापनि नायिका प्रियंका कार्की अमेरिका रहेकाले काम हुन सकेको छैन ।
Gaurab Pahari
