एजेन्सी– भारतीय क्रिकेट टिमका चर्चित कप्तान महेन्द्रसिंह धोनीको फिल्मले रिलिज अघि नै भारु ६० करोड कमाइसकेको छ । कप्तान धोनीको जीवनकथामा आधारित रहेर बनेको फिल्म ‘एमएस धोनी द अन्टोल्ड’ ३० सेप्टेम्बरमा रिलिज हुँदैछ ।

रिलिजअघि नै चर्चा बटुलेको उक्त फिल्म कुल ८० करोडको लगानीमा बन्न लागेको हो । निरज पाण्डेको निर्देशनमा बन्न लागेको उक्त फिल्मले ४५ करोड सेटलाइट राइट्सबाटै कमाइसकेको छ । १५ करोड भने फिल्म निर्माणको क्रममा जुटेका विभिन्न ब्राण्डबाट उठेको भारतीय मिडियाको दाबी छ । निमार्ण संस्थाले बाँकी २० करोड उठाउन कुनै आपत्ति नभएको जनाएको छ ।

निर्देशक पाण्डेले फिल्ममा धोनीको वास्ताविक जीवन कहानीलाई रुपान्तरण गराएका छन् । कथालाई अझ बलियो बनाउन धोनीको घर, विद्यालय र उनले टीटीको काम गरेको खड्गपुर स्टेसनको लोकेसनलाई पनि केन्द्रित गरिएको छ ।

फिल्मका दुई गीत ‘बेसब्रिया’ र ‘कौन तुझे’ चर्चित भइसकेका छन् । फिल्म रिलिज अघि नै हिट फिल्मको सूचिमा परेको कारण निर्देशक पाण्डे दङ्ग छन् ।