भदौ - २२ । राष्ट्रपति विद्यादेवी भण्डारीले अनशनरत गङ्गामाया अधिकारीलाई अनशन तोड्न आग्रह गरिन् । विगत छ वर्षदेखि अनशनरत गङ्गामाया अधिकारीको रक्षार्थ ‘गङ्गामाया बचाउ’ अभियानसम्बद्ध मानवअधिकारकर्मीसँगको भेटमा राष्ट्रपति भण्डारीले गङ्गामायाको कदमलाई आफूले गम्भीरतापूर्वक लिएको बताउँदै न्यायका लागि अनशनरत उनले अनशन तोड्नुपर्ने विचार व्यक्त गरिन। राष्ट्रपति भण्डारीले कुनै पनि व्यक्तिले न्यायका लागि आफ्नो जीवन दाउमा राख्नुपर्ने अवस्था सिर्जना हुनु अत्यन्त दुर्भाग्यपूर्ण भएको बताइन् । मानवअधिकारकर्मी इन्द्र अर्यालले गङ्गामायालाई न्याय दिलाउने अभियानमा मानवअधिकारकर्मीको साथ र सहयोग सदैव रहने र सम्बन्धित निकायको ध्यानाकर्षण गराइरहने बताइन्। उक्त अभियानअन्तर्गत प्रधानमन्त्री निवास बालुवाटार, सिंहदरबारलगायत स्थानमा पटक पटक धर्ना कार्यक्रम गरिसकिएको छ । विसं २०६१ मा मारिएका आफ्ना १७ वर्षीय छोरा कृष्णप्रसादको हत्यारामाथि कारबाहीको माग गर्दै छ वर्षदेखि गङ्गामाया अनशन बस्दै अाएका छन् । सँगै अनशनमा रहनुभएका श्रीमान् नन्दप्रसाद अधिकारीको ३३४ दिनमा निधन भएपछि गङ्गामाया एक्लैले अनशनलाई निरन्तरता दिएकी छन्। रासस

Ganga Maya Adhikari