भदौ - २३ । कनकाई नदीमा आएको बाढीले झापाको शिवशताक्षी नगरपालिका–८ का धर्मानन्दा रिजालको एक बिगाह खेतसहित घर बगाएपछि उनी अहिले घरको न घाटको भएका छन् । धार्मिक तथा पर्यटकीयस्थल चिल्लागढबाट केही दक्षिणमा रहेको उनको घर र एक बिगाह जमिन नदीले कटान गरेपछि उन घरको न घाटको भएका हुन् । केही समय अघिसम्म आफैँले उब्जाएको अन्नले घर व्यवहार चलाउँदै आएको उनीका अब सम्पत्तिका नाममा पशु मात्र छन् ।  पाँच जनाको परिवारसहित उनी अहिले छिमेकीको घरमा बस्तै आएका छन् । “नदी कटानले भएको एक बिगाह खेत पनि बगायो” रिजालले कनकाइ माईको भङ्गालो देखाउँदै भने – ऊ यही नेर थियो मेरो घर । वर्षात्मा आएको माई खोलाको बाढीले धार परिर्वतन गरेसँगै कटान तीव्र पारेकाले रिजालसहित तुलसी तिम्सिना, श्रीप्रसाद सुब्बा, लालबहादुर सुब्बा, विष्णुप्रसाद अधिकारी र याममाया पोखरेल छिमेकिको आश्रयमा पुगेका हुन् । नदीमा पानीको सतह घटे पनि कटान नरोकिएपछि त्रस्त चिल्लागढवासीमध्ये डम्वर रिजाल, विष्णुमाया रिजाल, मित्रलाल खरेल र छविलाल पोखरेलले घर भत्काउने तयारी गरिरहेका छन् । दिनानुदिन कटान तीव्र भएसँगै स्थानीयले लगाएको धानबालीमा पनि वस्तु चराउन थालेका छन् । स्थानीयको शरणमा बसेका उनीहरुले आफूहरुलाई कसैले पनि आर्थिक सहयोग नगरेको बताएका छन् । नेपाल रेडक्रस सोसाइटीले एक÷एक थान त्रिपाल र जिल्ला दैवी प्रकोप उद्धार समितिले रु ५÷५ हजारबाहेक अन्य सहयोग कतैबाट नजुटेको तिम्सिनाले बताए। “बाढीले घर पनि लाग्यो भएको खेत पनि बगायो” तिम्सिनाले भने– “अब के खाने कहाँ बस्ने ।” रासस

Jhapa Kankai Nadi