पुस १७ अमेरिकी सरकारले आगामी जनवरी १७ देखि लागु हुने गरी एक्स्ट्राअर्डिनरी ग्रिनकार्डको नियममा आमूल परिवर्तन गर्ने भएको छ ।

अमेरिकामा जागिरको अफर बिना नै दक्षताका आधारमा पाइने यो ग्रीनकार्डमा ब्यापक जालसाँजी भएको बताउँदै त्यसमा कडाइ गर्न नयाँ नियम ल्याएको बताइएको छ ।

नयाँ नियमअनुसार जालसाजी भएको प्रमाणित भएमा स्वीकृत भइसकेको आवेदन समेत खारेज हुनसक्ने छ । यसका लागि कसैले झुटो विवरण पेश गरेर जालसाँजी गरेको सूचना पाएमा त्यस्तो सूचना प्रदान गर्न सकिने व्यवस्था पनि गरिएको छ । यसका लागि छुट्टै इमेल र हुलाक ठेगाना पनि व्यवस्था गरिएको छ ।

नेपालीहरुले व्यापक उपयोग गर्दै आएको यस क्याटागोरीमा सन् २०१५ मा मात्र ७६ जना नेपालीले ग्रिनकार्ड पाएका थिए । यसैगरी श्रीमान् वा श्रीमतीले यस क्याटागोरीमा ग्रीन कार्ड पाएका उनीहरूका श्रीमती वा श्रीमानले पाउने ग्रीनकार्ड इबी टु क्याटेगोरीबाट ९ सय १९ र छोराछोरीले पाउँने इबी थ्री क्याटेगोरीबाट ३ सय ७७ जना नेपालीले ग्रिनकार्ड पाएका थिए ।

विज्ञान, कला, शिक्षा, व्यापार र खेलकुदका क्षेत्रमा एक्स्ट्राअर्डिनरी प्रमाणित गरेर ग्रीनकार्ड लिने यो क्याटागोरीमा खासगरी कला क्षेत्रमा क्स्ट्राअर्डिनरी प्रमाणित गरेर धेरै नेपाली कलाकार र उनीहरूका परिवारले ग्रीन कार्ड लिदैआएका छन् । उनीहरूका अतिरिक्त थोरै संख्यामा नेपाली पत्रकार, प्रोफेसर, शोधकर्ता, खेलाडीले पनि ग्रिनकार्ड लिएका छन् ।

अमेरिकी सरकारको नयाँ नियमबाट धेरै नेपालीहरू प्रभावित हुने अनुमान गरिएको छ । योसँगै अमेरिकाका रहेका नेपाली कानून व्यवसायीहरूको व्यवसाय पनि स्वतः प्रभावित हुने देखिन्छ ।

US Visa