माघ–२ । पोखरा रङ्गशालामा सहारा क्लब पोखराको आयोजनामा हुने १५ औँ आहा रारा गोल्डकप फुटबल प्रतियोगितामा १२ टोलीको सहभागिता रहने भएको छ । यही माघ ४ देखि १५ गतेसम्म हुने प्रतियोगितामा अमेरिका, बङ्गलादेश र भारतको फुटबल क्लबले पनि सहभागिता जनाउने छन् । आईतबार आयोजित पत्रकार सम्मेलनमा दिइएको जानकारी अनुसार अमेरिकाको अना युएसए फुटबल टिम, बङ्गलादेशको फरासगन्ज एससी र भारतको युनाइटेड सिक्किम फुटबल क्लबले भाग लिने छन् । त्यस्तै आयोजक सहारा क्लब, सुदूरपश्चिम ११ स्पोर्टिङ क्लब, धरान फुटबल क्लब, नेपाल एपिएफ क्लब, रमपम झापा ११, सङ्कटा क्लब, नेपाल पुलिस क्लब, लक्ष्मी हुन्डाई मनाङ मस्र्याङ्दी क्लब र त्रिभुवन आर्मी क्लब छन् । क्लबका महासचिव केशवराज बरालका अनुसार प्रतियोगिताको विजेताले रु पाँच लाख एक हजार एक र उपविजेताले रु दुई लाख ५१ हजार १ सहित सिल्ड, पदक र प्रमाणपत्र पाउने छन् । यस्तै प्रतियोगिताका उत्कृष्ट खेलाडीलाई नेपाल जनरल मार्केटिङ प्रालिद्वारा प्रायोजित ड्यास हिरो स्कुटर, प्रतियोगिता अवधिभर टिकट काटी अवलोकन गर्ने दर्शकमध्ये एक जनालाई गोलाप्रथाद्वारा एक तोला सुनको सिक्का र एलजी टेलिभिजन प्रदान गरिने क्लबका अध्यक्ष वीरभद्र आचार्यले बताए ।

रारा गोल्डकप सहारा क्लब पोखरा