माघ - ८ । १२ औं ढोरपाटन डबल लिग महिला भलिबल प्रतियोगिताको उपाधि रिड मोडल कलेजले जितेको छ । शनिबार भएको अन्तिम दिनको खेलमा रिड मोडल कलेजले विभागीय टिम सशस्त्र प्रहरीको एपीएफ क्लव र न्यु डायमण्डलार्ई पराजित गरेकोे हो । रिड मोडल अंक तालिकामा शीर्ष स्थानमा रहँदै उपाधि जित्न सफल भएको हो । प्रतियोगितामा १४ खेल खेलेको रिड मोडलले ४६ अंक जोडेको थियो । रिड मोडलले सशस्त्र प्रहरीको एपीएफ क्लबलाई २५–२०, २५–१६ र २५–२० सोझो सेटमा पराजित गर्यो । यस्तै अर्को खेलमा न्यु डाइमण्डलाई ३–१ को सेटमा पराजित गर्यो । पहिलो र दोस्राेँ सेट लगातार २५–१९ र २५–१६ ले जितेको रिड मोडल तेस्राेँ सेटमा भने २५–२३ ले पराजित भएको थियो । रिड मोडलले पुनः चौथो सेट २५–१९ ले आफ्नो पक्षमा पारेको थियो । सर्वाधिक पुरस्कार राशिको महिला डबल लिग भलिबलको विजेता रिड मोडलले तीन लाख २० हजारसहित रनिङ शिल्ड र मेडल प्राप्त गरेको छ । यस्तै दोस्रो हुने एपिएफले १ लाख ६० हजार र तेस्रो हुने न्यु डायमण्डले ७५ हजार रुपैयाँ प्राप्त गरेका छन् । चौथो देखि सातौ हुनेले क्रमशः ४५ हजार, ३५ हजार, २५ हजार र १५ हजार प्राप्त गरेका छन् ।

ढोरपाटन डबल लिग