–किशोरकुमार विश्वास प्रमुख तीन दलहरुको मेल हुने सम्भावना अझै देख्दिनँ । यदि तीन दल मिलेर मधेसी मोर्चालाई सहमतिमा ल्याएर चुनाव तिर लैजान खोजे भने अनर्थ हुन्छ । अनर्थ यसअर्थमा हुन्छ कि तीन दलले जति सुकै जे सुकै गरुन् मधेसी मोर्चा सहमतिमा आउँदै आउँदैन । अहिले मोर्चाले भनेको सिमांकन, संशाधन जस्ता विषय बेकारका बहाना मात्रै हुन् । मधेसी मोर्चाले अब के गर्छ भन्ने लाग्न सक्छ । म स्पष्ट शब्दमा लेखेरै दिन्छु, हेर्दै जानुहोला मधेसी मोर्चाको अहिलेको उद्देश्य नै संविधान विफल पार्ने नेपाललाई अन्यौलको अवस्थामा जाक्ने उद्देश्य हो । मधेसी मोर्चामा भएका दलहरु मध्ये सबैभन्दा खतरनाक चाहीँ तमलोपा र अध्यक्ष महन्थ ठाकूर हुन् । उनी अहिले भनिरहेका छन् कि –वर्षौदेखि मधेसमा विभेद भयो । वर्षौदेखि कांग्रेसमा रहेर सत्ताको भाग गर्नै यिनलाई यतिबेला थाहा भयो कि मधेसमा विभेद भयो भन्ने । तमलोपा भन्ने पार्टी नै भारतले बनाइदिएको हो । यो खतरनाक पनि छ । किनभने यो पार्टीको उद्देश्य त्यही हुन्छ, जे ‘र’ले बनाइदिन्छ । भूमिहार, राजपूत, ब्राम्हण र कायस्थहरुको यो पार्टीले मधेसको कुरा गरे पनि अवसर पाउँदा चाहिँ अरुलाई नभएर आफन्तका लागि काम गर्छ । मधेसी जनता भन्ने त सब नौटंकी हो । महन्थले सम्धिनीलाई सांसद र सम्धिलाई महामन्त्री बनाएको त सबैलाई थाहा नै छ । यस्ता व्यक्तिले मधेसीको हित गर्छन् भन्ने दिवास्वप्नमा छन् तराईका सोझा जनता । महन्थले धेरै पहिले देखि नै नेपाललाई बुहराष्ट्र मुलुक बनाउन प्रयास गरिरहेका छन् । ताकि भोली मधेस भन्ने अलग्गै मुलुक रहेछ भन्ने भावना मधेसीमा विकास गर्न सकियोस् । त्यसो गर्न सक्दा भारतलाई आफूले पठाएका अंगीकृते मधेसीहरुलाई उचालेर मधेस विखण्डनको आन्दोलन चर्काउने र पछि मधेस आफैमा मिसाउन सजिलो हुन्छ । भारतको त्यही चाहना पूरा गर्न तमलोपा अध्यक्ष महन्थ ठाकूर प्रयत्नशिल छन् । नेपालमा मधेसी मोर्चाकै अध्र्येल्याईका कारण संक्रमणकाल लम्ब्याउने कसरत भइरहेको छ । संक्रमणकाल जति लम्बिन्छ उग्रदक्षिणपन्थी, उग्रबामपन्थी र विखण्डनवादीहरु सल्बलाउँछन् । उदाहरणका लागि यो संक्रमणकाल पहिले नै समाप्त भएको भए अहिलेसम्म महन्थ ठाकूरजस्ता खतरनाक पात्रले टाउको उठाउने मौका नै पाउने थिएनन् । सिके राउत खुलेआम विखण्डनवादी क्रियाकलाप गर्ने, त्यो क्रियाकलापलाई वैधानिक बाटोबाट तमलोपाले सघाउने काम भइरहेको छ । सिके राउतलाई चोट लाग्दा महन्थ ठाकुरलाई दुख्छ । यो तथ्य विस्तारै सबैले थाहा पाउनेछन् । ‘तराईमा विखण्डनवादीहरु छन्, हामीले छाड्यौ भने उनीहरु सल्बलाउँछन्’ भनेर धम्क्याउने पनि महन्थ ठाकुर नै हुन् । तत्कालै चाहिँ महन्थको भूमिका संविधान समाप्त पार्ने नै हो । किनभने यो संविधानलाई भारतले स्वागत गरेको छैन । भारतले एक्कासी स्वागत गर्यो भने त महन्थ पनि त्यसै गर्छन् । नत्र महन्थ ठाकुरले तराईलाई, नेपाललाई नै चयनले जिउन दिने छैनन् । केही उपाय लागेन, तराईमा पनि मधेसी जनताले साथ दिएनन् भने मात्रै मधेसी मोर्चा चुनावमा जान्छ । नत्र देश खाडलमै जाओस उनीहरु लैनचौरको भोजमै रमाइरहने छन् । अब सिके राउतको क्रियाकलापलाई हेरौं । सिके राउतका विषयमा यति धेरै जनताको ध्यानाकर्षण भइसक्यो । तर सरकार बोलेको छैन । किनकी यो सरकार त भारतले बनाइदिएको हो । ऐनाले प्रचण्ड र विमलेन्द्र निधिको अनुहार होइन चरित्र देखाउने भइदिएको भए यी दुईले आफ्नो अनुहारमा लेन्डुप दोर्जेको आकृति पाउने थिए । यसकारण यो सरकारले सिके राउतको गतिविधिलाई नियन्त्रण गर्दैन । गरोस् पनि कसरी दुवैको पानी पिउँदो पँधेरो त एउटै हो । रंगेलीमा सिके राउत पक्राउ पर्दै त्यसलाई लामो समय जेलमा सडाउने प्रमाण थिए । तर दूर्भाग्य अदालतले मुक्त गरिदियो । अहिले त उसले बोलेको भिडियो नै सार्वजनिक भएको छ । अहिले पनि कारबाही गर्न प्रमाण पर्याप्त छ । तर ढुंगा बोल्ला सरकार बोल्दैन । यो सरकारलाई नेपाल समाप्त हुने क्रियाकलाप कस्तो राम्रो लागेको ? नेपाललाई भारतको अधिनमा पुर्याउने अझै खतरानक खेल चाहिँ अब दुई महिनापछि हुन्छ । दुई महिनापछि यो सरकार ढल्छ । त्यो थाहा पाएर नै केपी ओलीले सरकारलाई गलत्याएर हटाइन्छ भनेका हुन् । त्यसपछि शेरबहादुर देउवा प्रधानमन्त्री बन्नेछन् । अनि देखिन्छ अर्को नांगो नाच । (ध्रुव रिजालले बहुल राष्ट्रिय समाजवादी पार्टीका अध्यक्ष किशोरकुमार विश्वाससँग गर्नुभएको कुराकानीमा आधारित)