माघ–१६ । पोखरा रंगशालामा सम्पन्न भएको १५ औँ आहा रारा गोल्डकपको उपाधि मनाङ मस्र्याङदीले जितेको छ । मनाङ मस्र्याङदीले घरेलु टोली तथा आयोजक सहारा क्लबलाई १–० ले हराउँदै उपाधि जितेको हो । यससँगै मनाङले १२ औँ संस्करणको फाईनलमा आयोजक सहारासँग पराजित भएको बदला लिएको छ । मनाङका डिफेन्डर कमल श्रेष्ठले खेलको ७० मिनेटमा ३५ यार्डबाट हानेको प्रहार गोलमा परिणत भएपछि १५ औँ संस्करण जित्न सफल भएको हो । हिमश्री फुड्सको मुख्य प्रयोजनमा आयोजित फुटबल प्रतियोगिता जितेसँगै मनाङले पाँच लाख नगद पाएको छ । त्यस्तै प्रतियोगिताको उत्कृष्ट खेलाडी हुँदै सहाराका गोलकिपर सुजित गुरुङले हिरो ड्यास स्कुटर जितेका छन् । यस्तै सर्वाधिक गोलकर्ता कर्ण लिम्बु (झापा) ले २५ हजार नगद पाएका छन् । फेयरप्ले अवार्ड भने झापा ११ ले जितेको छ ।

१५ औँ आहा रारा गोल्डकप मनाङ मस्र्याङदी