रत्ननगर । चितवनको रत्ननगरस्थित शान्तिचोकमा ट्र्याक्टरको ठक्करबाट आज मोटरसाइकल चालकको मृत्यु भएको छ । 

पूर्वी चितवनबाट भरतपुरतर्फ आउँदै गरेको ना १६ प ७९३१ नम्बरको मोटरसाइकललाई सोही दिशाबाट आउँदै गरेको ना ३ त ३३४५ नम्बरको ट्र्याक्टरले ठक्कर दिँदा सो दुर्घटना भएको हो । 

दुर्घटनामा परी चितवनको राप्ती नगरपालिका–७ का अन्दाजी ५५ वर्षका मोटरसाइकल चालक मनोजकुमार पोखरेलको मृत्यु भएको चितवनका प्रहरी उपरीक्षक दीपक थापाले जानकारी दिए । बिहान १० बजे भएको उक्त दुर्घटनामा परी गम्भीर घाइते भएका पोखरेलको उपचारका क्रममा ११ बजे चितवन मेडिकल कलेजमा मृत्यु भएको जिल्ला प्रहरी कार्यालय चितवनले जनाएको छ । 

दुर्घटनापछि ट्र्याक्टर र चालकलाई नियन्त्रणमा लिइएको र घटनाको अनुसन्धान भइरहेको प्रहरीले जनाएको छ ।