इंग्लिस प्रिमियर लिगअन्तर्गत आईतबार राति भएको खेलमा चेल्सी १–० ले विजयी भएको छ ।

म्यानचेस्टर युनाइटेडविरुद्धको खेलमा पहिलो हाफ गोलरहित बराबरीमा रोकिएको थियो । त्यसपछि एल्भारो मोराताले चेल्सीलाई ५५ औं मिनेटमा गोल गर्दै अग्रता दिलाएका थिए । उक्त गोलपछि खेल अवधिभर दुवै टोलीबाट गोल हुन नसकेपछि खेल चेल्सीले १–० ले जित्न सफल रह्यो ।

हारसँगै युनाइटेड समूहको शीर्ष स्थानमा रहेको म्यानचेस्टर सिटीभन्दा ८ अंकले पछि परेको छ । यो सिजनमा युनाइटेडको यो दोस्रो हार रहेको छ । यसअघि युनाइटेड हर्डसफिल्ड टाउनसँग पराजित भएको थियो ।

गएराति नै भएको खेलमा म्यानचेस्टर सिटीले आर्सनललाई ३–१ ले पराजित गर्दै ८ अंकको अग्रता बनाउन सफल भएको हो । लगातार नौं खेल जित्ने क्रममा आर्सनलविरुद्धको खेलमा केविन डि ब्राउन, सर्जियो अग्युरो र गाब्रियल जिससले गोल गरे ।

युनाइटेडको ११ खेलबाट २३ अंक छ भने सिटीको ३१ अंक छ । यसअघि राति नै भएको अन्य खेलमा टोटनह्यामले क्रिष्टल प्यालेसलाई पराजित गर्दै युनाइटेडसँग अंक बराबरी गरेको छ । यता युनाइटेडलाई पराजित गरेको चेल्सी २२ अंकका साथ चौथो स्थानमा छ ।