यी नायिका भन्छिन्, मलाई पेन्सनको व्यवस्था गरियोस अनि मात्र मलाई यौन शोषण गर्नेको नाम भन्छु
मुम्बई । हलिउडमा जस्तै बलिउडमा पनि नायिकाहरूले आफूमाथि यौन शोषण भएको खुलासा गर्न थालेका छन् । तर रोजीरोटीको चिन्ताका कारण ती नायिका आफूलाई यौन शोषण गर्ने व्यक्तिका बारेमा भने विस्तृत खुलाउन चाहँदैनन् ।
नायिका ऋचा चढ्ढाले कामको चिन्ताले नायिकाहरू आफू पीडित भए पनि खुल्न नचाहेको बताइन् । केही समयअघि यही विषयमा ब्लग लेखेपछि ऋचा नारीवादीहरूको निशानामा परिन् । नारीवादीहरूले सोधे, ‘तिमी यौन शोषण भयो भन्छ्यौ, तर आफूलाई यौन शोषण गर्ने व्यक्तिका बारेमा किन उल्लेख गर्दिनौ ?’
जवाफमा ऋचाले भनिन्, ‘मलाई पेन्सनको व्यवस्था गरिदिनुस्, म भन्छु ।’ यौन शोषण गर्ने व्यक्तिका बारेमा मुख खोलेपछि फिल्म र टेलिभिजनले कामै दिन छोड्ने उनको भनाइ थियो । उनले थपिन्, ‘यदि कामको ग्यारेन्टी गरिदिने हो भने लाख युवती खुलेर आउँछन् र यौन शोषणको कहानी बताउँछन् ।’
यौन शोषणका बारेमा खुलेर कुरा गर्ने युवतीहरूलाई बलिउडले कहिल्यै सुरक्षा नदिएको उनको भनाइ थियो । उनको भनाइअनुसार महिलाका विषयमा फिल्म बनाउने निर्देशकहरू यौनको मामलामा सबैभन्दा खराब छन् ।
