माघ - २१ । शुक्रबार एकाबिहानै रोल्पाका प्रमुख जिल्ला अधिकारी डा डिजन भट्टराईले झाडु लगाएपछि टुँडिखेलको मुहार फेरिएको छ । रोल्पा सदरमुकामको मुटु मानिएको टुँडिखेलमा थुपारिएका सुन्तलाका बोक्रासहितको सम्पूर्ण फोहर व्यवस्थापन गरिएको छ । यत्रतत्र छरिएका निर्माण सामग्री व्यवस्थित भएका छन् भने टुँडिखेलमा पार्किङ गरिएका यातायातका साधन पनि हटाइएको छ । घन्टौँ हिँडेर डोकोमा सुन्तला बेच्नकै लागि सदरमुकाम आएका टोलीलाई लाइन लगाएर व्यवसाय सञ्चालन गर्न निर्देशन दिइएको छ भने सुन्तलाका बोक्रा व्यवस्थितरुपले जम्मा गर्नका लागि डस्टबिनको व्यवस्था गरिएको छ । प्रजिअ डा भट्टराईले रबरका पञ्जा लगाएका हातले झाडु समाएर टुँडिखेल बडार्न थालेपछि स्थानीय विकास अधिकारी सुशील वैद्य, प्रहरी नायब उपरीक्षक रामप्रसाद घर्तीमगर, लिबाङ नगरपालिकाका कार्यकारी अधिकृत निमबहादुर केसी, जिल्ला विकास समितिका स्रोत व्यक्ति दामोदरप्रसाद सुवेदीसहित प्रहरीको ठूलो समूहले उनलाई साथ दिएको थियो । प्रहरी नायब उपरीक्षक घर्तीमगर भने हात हालेर नाला सफा गर्ने अभियानमा व्यस्त देखिन्थे । यसरी टुँडिखेल वरपरको सरसफाइ अभियान सकिएलगत्तै प्रजिअ डा भट्टराईले भने, ‘यदि हामी स्वच्छ र स्वस्थ्य समाजमा बस्न चाहन्छौँ भने हामीले हाम्रो फोहर व्यवस्थापन आफैं गरौँ । आफ्नो घर वरपरको फोहर व्यवस्थापनका लागि अरुको मुख नताकौँ । हाम्रो अभियान सफा रोल्पाको अभियान हो । आउनुस् यो अभियानमा तपार्इं हामी सबैसँगै हातेमालो गरेर अघि बढौँ ।’ स्थानीय विकास अधिकारी सुशील वैद्यले जिल्लाको सरसफाइ अभियानमा कर्मचारी र प्रहरीको सक्रियताले मात्र पूर्णता पाउन नसक्ने हुँदा स्थानीयवासी पनि जुट्नुपर्नेमा जोड दिए । उनले नगरवासीलाई भने, ‘आउनुस् जिल्लाको सरसफाइ अभियानमा सँगै हातेमालो गरेर अघि बढौँ, त्यसका लागि जिविसले जस्तोसुकै समन्वयकारी भूमिका निर्वाह गर्न तयार छ ।’ यस्तै प्रहरी नायब उपरीक्षक रामप्रसाद घर्तीमगरले पनि गाउँ, टोल र समाजलाई सुन्दर अनि सफा बनाउने दायित्व सबैको हो भन्नका लागि प्रहरीले जनचेतना फैलाउँदै आएको हो, यसमा स्थानीयवासीले पनि साथ दिनुपर्छ, कर्मचारी त आज आउँछ भोलि जान्छ तर नगरवासी स्थायी रुपमा नगरमै बस्ने भएको हुँदा सरसफाइमा सबैको चासो र चिन्ता हुनुपर्नेमा जोड दिए । कर्मचारी र प्रहरीले थालेको सरसफाइ अभियानमा स्थानीयवासीको उपस्थिति नभए पनि बयोवृद्ध दुर्गाप्रसाद आचार्य भने उपस्थित थिए ।

rolpa