माघ–२१ । बाराको सिमरा रंगशालामा जारी रुस्लान आठौं सिमरा गोल्डकप फुटबलअन्तर्गत शुक्रबार भएको खेलमा जित्दै सीएमजी क्लब संकटा सेमिफाइनलमा प्रवेश गरेको छ । संकटाले विभागीय टिम सशस्त्र प्रहरीको एपीएफ क्लबलाई २–० पराजित गर्दै सेमिफाइनलको यात्रा तय गरेको हो । संकटाको जितको लागि राज पौडेल र सुशील केसीले गोल गरे । खेलको ४१ औं मिनेटमा अफ्रिकन खेलाडी मार्टिन अजाईको पासलाई सदुपयोग गर्दै राजले संकटालाई सुरुवाति अग्रता दिलाएका थिए । त्यस्तै पहिलो हाफको इन्जुरी समयमा सुशीलले गरेको गोल निर्णायक गोल बन्यो । संकटाका मार्टिन अजाई ‘पतन्जली म्यान अफ द म्याच’ घोषित हुँदै ५ हजार नगद पुरस्कार पाएका छन् । शनिबार सहारा क्लब पोखरा र वीरगन्ज युनाइटेड क्लबबीच प्रतिस्पर्धा हुनेछ ।

सिमरा गोल्डकप सीएमजी क्लब संकटा