फागुन–१३ । नेपाली क्रिकेट टोली शुक्रबार आइसिसी वल्र्ड क्रिकेट लिग च्याम्पियनसिप अन्तर्गत खेलको तयारीको लागि भारत जाँदैछ । बन्द प्रशिक्षणबाट छानिएका १९ मध्ये कप्तान पारस खड्का बाहेक १८ खेलाडी र ६ जना प्रशिक्षण र व्यवस्थापनकासहित २४ सदस्यीय नेपाली टोली शुक्रबार बेलुका ५ बजे भारतको दिल्ली हुँदै नोयडाका लागि जान लागेको हो । कप्तान पारस भने केही दिन अघि मात्र एपेण्डिक्सको शल्यक्रिया गरेका कारण भारत नजाने भएका हुन् । आइसिसीले बन्दोबस्त गरेको उक्त भ्रमणमा नेपाली टोलीले नोयडामा राजस्थान र अफगानिस्तान ए टिमसँग अभ्यास खेल खेल्ने बताएपनि सबै विवरण भने आइसकेको छैन । नेपालले नोयडामा आउँदो आइतबार, मंगलबार र बिहीबार अभ्यास खेल खेल्नेछ । नेपाली टोली आउँदो शुक्रबार नेपाल फर्किनेछ । नेपाली टीममा १८ जना खेलाडीसहित मुख्य प्रशिक्षक जगत टमाटा, सहायक प्रशिक्षक विनोद दास, म्यानेजर रमन शिवाकोटी, र फिजियो दिनेश भट्ट र टिमका हेल्थ ट्रेनर राजेश चौहान रहनेछन् ।

अभ्यास खेल क्रिकेट नेपाली टोली भारत